के गर्भवती महिलाहरूलाई प्रदूषित हावाले गम्भीर क्षति पुर्‍याउछ ?

काठमाडौँ – विषाक्त हावामा सास फेर्नु अत्यन्तै खतरनाक हुन सक्छ। यसले शरीरका धेरै भागहरूमा गम्भीर क्षति पुर्‍याउन सक्छ। एक अनुसन्धानमा अचम्मलाग्दो खुलासा भएको छ।

यसमा भनिएको छ, यदि कुनै महिला गर्भावस्थाको तीन महिना अघि वायु प्रदूषण कण पदार्थ (PM 2.5-10) र नाइट्रोजन डाइअक्साइडको सम्पर्कमा आइन् भने, जन्मेको दुई वर्षसम्म बच्चा मोटोपनको जोखिममा पर्न सक्छ। यसले बच्चाको स्वास्थ्यमा गम्भीर असर पार्न सक्छ।

गर्भावस्थामा प्रदूषणको प्रभाव

प्रदूषणको साइड इफेक्टमा धेरै अनुसन्धानहरू भइसकेका छन्। जसमा गर्भावस्थामा यसको के प्रभाव पर्छ भनेर बताइएको छ, तर गर्भधारण गर्नुअघि हुने साइड इफेक्टको बारेमा पहिलो पटक अनुसन्धान गरिएको छ।

अमेरिका र चीनका अनुसन्धानकर्ताहरूको टोलीले यस नयाँ अध्ययनमा चकित पार्ने खुलासा गरेको छ। वातावरणीय अनुसन्धान पत्रिकामा प्रकाशित अनुसन्धान अनुसार गर्भधारण गर्नुभन्दा तीन महिना अघि प्रदूषित हावाको सम्पर्कमा आउँदा शुक्रकीट र अण्डाको स्वास्थ्यमा असर पर्छ। यस अनुसन्धानमा सांघाईका ५,८३४ आमा र बालबालिका समावेश थिए।

अनुसन्धानले के भन्छ ?

यस अनुसन्धानले गर्भावस्था अघि PM २.५ देखि PM १० र नाइट्रोजन डाइअक्साइडको सम्पर्कमा आउँदा BMI वा BMIZ बढ्न सक्ने पत्ता लगायो। दक्षिणी क्यालिफोर्निया विश्वविद्यालयको केक स्कूल अफ मेडिसिनका पोस्टडक्टोरल अनुसन्धानकर्ता जियावेन लियाओले यस अनुसन्धान अनुसार गर्भावस्था अघिको तीन महिना धेरै महत्त्वपूर्ण रहेकाे बताए ।

उनले बच्चा जन्माउने योजना बनाइरहेका जोडीहरूले प्रदूषित हावाबाट बच्नुपर्ने बताएका छन्। अनुसन्धानकर्ताहरूका अनुसार बच्चाको BMIZ गर्भावस्था अघिदेखि जन्मेको दुई वर्षसम्म ०.०७८ ले बढ्न सक्छ।

विषाक्त हावामा सास फेर्दा तौल बढ्नु

अनुसन्धानका अनुसार विषाक्त हावामा सास फेर्ने आमाका बच्चाहरूको तौल जन्मपछि बढेको थियो। अनुसन्धानले भनेको छ कि वायु प्रदूषणको सम्पर्कमा आउँदा बालबालिकामा मोटोपना बाहेक अन्य धेरै समस्याहरू निम्त्याउन सक्छ।

यद्यपि, यो अनुसन्धान केवल विश्लेषणमा आधारित छ, त्यसैले अब थप अनुसन्धान आवश्यक छ। तैपनि, प्रदूषणको खतरालाई विचार गर्दै, गर्भवती महिलाहरू अझ सतर्क हुन आवश्यक छ।