महिला भलिबल लिग: आज अन्तिम चरणका खेल हुँदै, को पुग्ला फाइनलमा ?

काठमाडौँ – जारी एभरेस्ट महिला भलिबल लिग अन्तर्गत आज लिग चरणका अन्तिम खेल हुँदै छन् ।

लिगमा ४-४ खेल सम्पन्न हुँदा कर्णाली यशविस शीर्ष स्थानमा रहेको छ । कर्णाली ४ खेलमा अपराजित रहँदै १० अङ्क हासिल गरेको छ । त्यस्तै काठमाडौँ स्पाइकर्स ४ खेलमा ३ जित र एक हारसहित ९ अङ्कसहित दोस्रो स्थानमा रहेको छ ।

त्यसैगरी चितवन शक्ति ४ खेलमा २ जित र २ हारसहित ७ अङ्क हासिल गर्दै तेस्रो र ललितपुर क्वीन्स ४ खेलमा २ जित र २ हारसहित ७ अङ्क हासिल गर्दै चौथो स्थानमा रहेको छ ।

त्यस्तै फाइनलको दौडबाट बाहिरिएको गण्डकी थण्डर्सको ४ खेलमा एक जित र ३ हारसहित केवल ३ अङ्क छ भने मधेश युनाइटेडले ४ खेलमा सबै खेलमा हार बेहोरेर अङ्कविहीन रहेको छ ।

अब आज लिग चरणको अन्तिम खेलमा शीर्ष स्थानमा रहेको कर्णाली र दोस्रो स्थानमा रहेको काठमाडौँ भिड्दै छन् । यो खेलको विजेता फाइनलमा पुग्ने निश्चित छ । यो खेल राति ७: ४५ बजेदेखि शुरु हुने छ ।

त्यसैगरी तेस्रो स्थानमा रहेको ललितपुर क्वीन्स र चौथो स्थानमा रहेको चितवन शक्तिबीच आजको पहिलो खेल हुँदै छ । यो खेल अपराह्न ३: ४५ बजेदेखि शुरु हुँदै छ ।

त्यसैगरी आजको दोस्रो खेल मधेश युनाइटेड र गण्डकी थण्डर्सबीच हुँदै छ । यो खेल अपरान्ह ५: ४५ बजेदेखि शुरू हुने छ । दुवै फाइनलको दौडबाट बाहिरिएकाले यस खेलको नतिजाले फाइनलको समीकरणमा कुनै असर गर्ने छैन ।