पेरिस ओलम्पिक : आज नेपालले दुई खेलमा प्रतिस्पर्धा गर्दै

काठमाडौं – पेरिस ओलम्पिकमा आज  जुडोकी मनिता श्रेष्ठ प्रधान र ब्याडमिन्टनका प्रिन्स दाहालले खेल्दै छन् ।

मनिता श्रेष्ठ प्रधानले ५७ केजी मुनिको तौल समूहमा सर्वियाकी परिसिकसँग खेल्ने तालिका छ भने प्रिन्स दाहालले समूह चरणको दोस्रो खेल खेल्न लागेका हुन् ।

प्रिन्सले आज राति समूह चरणको दोस्रो खेलमा आयरल्यान्डका नियात नुयनसँग खेल्ने तालिका छ । प्रिन्सका प्रतिस्पर्धी नुयन वरियताको ४३ औँ स्थानमा छन् भने प्रिन्स १ सय ७२ औँ स्थानमा छन् ।

समूह ‘पी’ अन्तर्गत समूह चरणको अन्तिम खेलमा प्रिन्सले इजरायलका मिसा जिल्वरमनसँग खेल्ने छन् । यसअघि भएको समूह चरणको पहिलो खेलमा प्रिन्स विश्व वरियतामा दोस्रो नम्बरमा रहेका डेनमार्कका भिक्टर एक्सेलसनसँग पराजित भएका थिए । 

प्रतियोगिताको तेस्रो दिन आइतबार पौडीका डुवाना लामा र सुटिङकी सुस्मिता नेपालले प्रतिस्पर्धा गरेका थिए । दुवै खेलाडीले पहिलो चरणबाट बाहिरिएका छन् । यसअघि टेबुलटेनिसका स्यान्टु श्रेष्ठ पहिलो चरणमै पराजित भए ।