काठमाडौँ – सेभेन सिज सिनेमाको प्रस्तुतिमा बन्न लागेको फिल्म ‘पूर्ण बहादुरको सारङ्गी’को छायाङ्कन शुरु गरिएको छ ।
प्रकाश सपूत र बाल कलाकार जान्भि पौडेलको पहिलो दृश्य खिचेर शुरु भएको छायाङ्कन ओखलढुङ्गा जिल्लाको रुम्जाटारमा भइरहेको हो ।
फिल्ममा विजय बराल, प्रकाश सपूत, मुकुन भुसाल, अञ्जना बराइलीको मुख्य भूमिका रहेको छ । फिल्ममा विनोद न्यौपाने, भोलाराज सापकोटा, बुद्धि तामाङ, माओत्से गुरुङ र देशभक्त खनाल लगायतका कलाकार पनि देखिनेछन् । फिल्मको बालकलाकारमा जान्भिको अलवा स्वायम् केसीको अभिनय रहनेछ ।
फिल्मका लेखन तथा निर्देशन सरोज पौडेल हुन् । सोसल–ड्रामा जनरामा बन्ने फिल्म गन्धर्व परिवारको कथामा आधारित रहनेछ भने यसलाई अन्तर्राष्ट्रिय रूपमा फिल्म वितरण गर्दै आएको कम्पनी सेभेन सिज इन्टरटेनमेन्टले निर्माण गर्न लागेको हो ।
फिल्ममा महेश दवाडीको पटकथा तथा प्रशान्त सिवाकोटीको संगीत रहेको यो फिल्मको लगानीकर्ता विनोद पौडेल र प्याट्रिक सुवेदी हुन् । निर्माण टिमले फिल्मलाई विसं २०८२ सालभित्र विश्व बजारमा प्रदर्शन गर्ने लक्ष्य राखेको छ ।
यो खबर पढेर तपाईलाई कस्तो महसुस भयो ?
प्रतिक्रिया