फ्रेन्च लिग वानको उपाधि पिएसजीको पोल्टामा

काठमाडौँ – पिएसजीले फ्रेन्च लिग वानको उपाधि जितेको छ । गएराती सम्पन्न खेलमा टोउलोउससँग ३-१ गोलको हार बेहोरेपनि पिएसजीले यस सिजनको लिग जितेको हो ।

टोउलोउसको जितमा थिजस डालिंगा, यन बोहो र फ्र्यांक माग्रीले एक एक गोल गरेका थिए । त्यसैगरी पिएसजीका लागि एक गोल किलियन एम्बाप्पेले गरेका थिए ।

यस सिजनको लिगमा पिएसजीको यो दोस्रो हार हो । ३२ खेलमा ७० अङ्क रहेको पिएसजी लिगमा शीर्ष स्थानमा कायम रहेको छ र यस सिजनका दुई खेल अघि नै उपाधि जितेको छ । दोस्रो स्थानमा रहेको मोनाको ३३ खेलमा ६४ अङ्क सहित ६ अङ्कले पछाडि परेपछि पिएसजीले उपाधि जितेको हो । यस सिजनमा लिगमा ३४ खेल मात्र खेलिँदै छ ।

पिएसजीको यो १२औँ फ्रेन्च लिग वानको उपाधि हो । भने पछिल्लो तीन वर्ष लगातार पिएसजीले यो उपाधि जितेको छ ।