तीस लाखको लागतमा बिपी मैदानमा प्यारापिट निर्माण

तनहुँ– जिल्लाको व्यास नगरपालिका–३ बिपी वन बाटिका खेलमैदानमा ‘इलेभेन ए साइड’ खेलमैदानमा दुई सय ५० जना दर्शक बस्न सक्ने प्याराफिट निर्माण भएको छ ।

व्यास नगरपालिकाको रु ३० लाख आर्थिक सहयोगमा एक हजार एक सय २७ वर्गफिट क्षेत्रफलमा निर्माणाधीन प्याराफिटको ७५ प्रतिशत काम पूरा भएको हो । 

प्याराफिटले दर्शकलाई घामपानीबाट बचाउँछ , उक्त खेलमैदानलाई फुटबल, भलिबल, टेबल टेनिस, ब्याडमिन्टन, बास्केटबललगायत खेल प्रतियोगिता सञ्चालन गर्ने लक्ष्य रहेको बिपी वनबाटिक खेलमैदान निर्माण समितिका अध्यक्ष भुवन गोशलीले बताए। 

 यसअघि भिमाद नगरपालिका–६ क्याम्पस रोडस्थित रङ्गशालामा प्याराफिट निर्माण भएको थियो । तीन हजार दर्शक क्षमताको उक्त प्याराफिट कूल रु ५२ लाख ८४ हजार दुई सय लागतमा निर्माण भएको हो ।

प्याराफिट बनाउन भिमाद नगरपालिकाको रु ४६ लाख ८० हजार र स्थानीयले रु छ लाख चार हजार दुई सय सहयोग गरेका थिए ।