जितपछि म्यानचेस्टर सिटी शीर्ष स्थानमा

काठमाडौँ – इङलिश प्रिमियर लिग अन्तर्गत म्यानचेस्टर सिटीले लुटन टाउनमाथि फराकिलो जित हासिल गरेको छ ।

गएराती सम्पन्न खेलमा म्यानचेस्टर सिटीले लुटन टाउनलाई ५-१ गोल अन्तरले पराजित गरेको हो ।

म्यानचेस्टर सिटीको जितमा इर्लिंग हालाण्ड, माटेओ कोभाकिक, जेरेमी डोकु र जोस्को गभारडिओलले एक एक गोल गरेका थिए भने एक गोल लुटन टाउनका डैकी हशिओकाले आत्मघाती गोल गरेका थिए । त्यस्तै लुटन टाउनका लागि एक गोल रोज बार्कलीले गरेका थिए ।

यो जितपछि म्यानचेस्टर सिटी प्रिमियर लिगको शीर्ष स्थानमा उक्लिएको छ । सिटीको ३२ खेलमा ७३ अङ्क भएको छ ।

त्यस्तै एक खेल कम खेलेको आर्सनलको ३१ खेलमा ७१ अङ्क छ भने लिभरपुलको पनि ३१ खेलमा ७१ अङ्क नै छ ।

त्यसैगरी लुटन टाउनको ३३ खेलमा २५ अङ्क रहेको छ र रेलिगेसन जोनमा रहेको छ ।