काठमाडौँ– नेपाल क्रिकेट संघ (क्यान) ले ग्रेड ‘ए’ मा परेका खेलाडीलाई मासिक एक लाख तलब दिने भएको छ । शनिवार र सोमवार बसेको क्यानको कार्यसमिति बैठकले खेलाडीहरुको वर्गीकरण गर्दै तलब समेत बढाउने निर्णय गरेको हो ।
क्यानले ३० जना खेलाडीलाई ग्रेडमा वर्गीकरण गरेको हो ।
क्यानले दिएको जानकारी अनुसार ग्रेड ‘ए’ मा कप्तान रोहित पौडेल, सोमपाली कामी, करण केसी, दीपेन्द्र सिंह ऐरी, आसिफ शेख र कुशल भुर्तेल परेका छन् । अब उनीहरुले मासिक एक लाख तलब पाउने क्यानले जनाएको छ ।
यस्तै ग्रेड ‘बी’ मा पर्ने खेलाडीको मासिक तलब ७० हजार बनाइएको छ । ग्रेड ‘बी’ मा कुशल मल्ल, गुलशन झा, भीम सार्की, ललित नारायण राजवंशी, आरिफ शेख र अविनाश बोहरा परेका छन् ।
यस्तै क्यानले ग्रेड ‘सी’ मा विनोद भण्डारी, अर्जुन साउद, सन्दीप जोरा, प्रतिस जिसी राखेको छ । उनीहरुको मासिक तलब ५५ हजार रुपैयाँ तोकिएको क्यानले जनाएको छ ।
त्यसै गरी ‘ग्रेड डी’ मा पवन सर्राफ, सागर ढकाल, अनिल साह, विवेक कुमार यादव, आकाश चन्द, बसिर अहमद र सूर्य तामाङ परेका छन् । उनीहरुको मासिक तलब ३५ हजार तोकिएको छ ।
बाँकी सात प्रदेशका इमर्जिङ क्याटगोरीका ७ खेलाडीलाई मासिक २५ हजार दिइने क्यानले जनाएको छ । इमर्जिङ क्याटोगरीमा कोशीका दिपेश कँडेल, मधेशका रुपेश सिंह, बागमतीका रिजन ढकाल, गण्डकीका बिपिन खत्री, लुम्बिनीका देव खनाल, कर्णालीका अर्जुन घर्ती र सूदुरपश्चिमका हेमन्त धामी रहेका छन् ।
त्यस्तै क्यानले नेपाली महिला क्रिकेटरलाई पनि वर्गीकरण गरेको छ । महिलाको तलब भने पुरुषको तुलनामा आधा कम तोकिएको छ ।
क्यानका अनुसार वर्गीकरण गरिएका १९ खेलाडीमा तीन जना महिला खेलाडी ग्रेड ‘ए’ मा परेका छन् । ग्रेड ‘ए’ मा इन्दु बर्मा, रुबिना क्षेत्री र सीता राना मगर परेका छन् । उनीहरुको मासिक तलब ५० हजार रुपैयाँ तोकिएको छ ।
यस्तै ग्रेड ‘बी’ मा कविता कुँवर परेकी छिन् । क्यानका अनुसार उनको मासिक तलब ३५ हजार हुनेछ ।
त्यसै गरी ग्रेड ‘सी’ मा परेका महिला खेलाडीले मासिक तलब ३० हजार उपलब्ध गराउने भएको छ । ग्रेड ‘सी’ मा पूजा महतो र अश्मिना कर्माचार्य परेका छन् ।
क्यानको सूचीमा ग्रेड ‘डी’ मा अप्सरी बेगम, कविता जोशी, संगीता राई, काजोल श्रेष्ठ र बिन्दु रावल परेका छन् । उनीहरुको मासिक तलब २५ हजार हुने क्यानले जनाएको छ ।
यस्तै इमर्जिङ क्याटोगोरीमा परेका सोनी पाख्रिन, खुशी डंगोल, ज्योत्सनिका मरासिनी, कन्चन श्रेष्ठ, रुवि पोदार, सृष्टि जैसी, सम्झनाकुमारी खड्का, सना प्रविनलाई मासिक २० हजार दिने पनि क्यानले जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया