एसीसी महिला प्रिमियर कप : फाइनल पुग्न आज मलेसिया र नेपालबिच प्रतिस्पर्धा

काठमाडौँ – मलेसियामा जारी एसीसी महिला प्रिमियर कपको फाइनल प्रवेशका लागि आज नेपालले मलेसियासँग खेल्दै छ । खेल नेपाली समय अनुसार बिहान सवा ११ बजे हुने छ । 

मलेसियासँगको खेलमा जित निकाले नेपाल एसीसी महिला प्रिमियर कपको फाइनल प्रवेश गर्नेछ । यसअघि बुधवार भएको खेलमा जापानलाई १६ रनले पराजित गर्दै मलेसिया प्रतियोगिताको सेमिफाइनलमा पुगेको हो ।

त्यस्तै बुधबार नै कुवेतविरुद्धको खेलमा नेपाल डकवर्थ लेविस पद्धति अनुसार आठ विकेटले विजयी भएको थियो । 

दुवै टोली अपराजित रहँदै सेमिफाइनलमा आइपुगेका हुन भने नेपाल र मलेसियाबीच महिला टी–२० खेलमा कुल १० खेल भएका छन् । नेपाल ७ खेलमा जित र ३ खेलमा पराजित भएको छ ।

यो प्रतियोगिताको फाइनलमा पुग्ने दुई टोलीले आगामी जुलाईमा आयोजना हुने महिला टी–२० एसिया कपमा सहभागिता जनाउन पाउने छ । एसिया कपमा भारत, पाकिस्तान, बङ्गलादेश, श्रीलङ्का र छनोट चरणबाट आउने दुई टोली सहभागी हुनेछन् ।