काठमाडौँ– संयुक्त राज्य अमेरिकामा आज (आइतवार) देखि भिडियो शेयरिङ एप टिकटक नचल्ने बनाइएको छ । यसअघि अमेरिकी सरकारले सुरक्षाको कारण देखाउँदै टिकटकमा प्रतिबन्ध लगाउने निर्णय गरेको थियो ।
चिनियाँ प्रविधि कम्पनी बाइटडान्सको स्वामित्वमा रहेको टिकटकले राष्ट्रिय सुरक्षामा पार्न सक्ने सम्भावित जोखिमलाई लिएर लामो समयदेखि टिकटकमाथि प्रतिबन्ध लगाउने तयारी थालेको थियो ।
अमेरिकाले टिकटकलाई राष्ट्रिय सुरक्षाको दृष्टिकोणबाट निकै जोखिमपूर्ण मान्दै आएको छ । अमेरिकी अधिकारीहरुले टिकटकले चीन सरकारलाई अमेरिकी प्रयोगकर्ताका व्यक्तिगत विवरण र गोप्य जानकारी दिँदै आएको आरोप लगाउँदै आएका छन् । तर, टिकटकले भने बारम्बार यो आरोपको खण्डन गर्दै आइरहेको छ । टिकटक र चीन सरकारबीच कुनै सम्बन्ध नरहेको टिकटकले बताउने गरेको छ ।
गत वर्ष अप्रिल महिनामा अमेरिकी कंग्रेसले पारित गरेको कानुनले बाइटडान्सलाई कुनै अमेरिकी कम्पनीलाई टिकटक बेच्न वा प्रतिबन्धको सामना गर्ने विकल्प दिएको थियो ।
कंग्रेसमा रहेका डेमोक्र्याटिक र रिपब्लिकन दुवै पार्टीका सांसदहरूले यो कानुनको समर्थन गरेका थिए । यद्यपि, टिकटकले उक्त कानुनको विरुद्ध अदालतमा चुनौती दिएको थियो । कंग्रेसको कदमले अमेरिकी टिकटक प्रयोगकर्ताको वाक स्वतन्त्रताको उल्लङ्घन हुने टिकटकको भनाइ थियो ।
हुन त केही अमेरिकीहरुले टिकटक खरिद गर्ने प्रस्ताव पनि गरेका थिए । संसारका धनाढ्य व्यक्ति इलोन मस्क र सबैभन्दा धेरै सब्सक्राइबर भएका युट्युबर मिस्टर बिस्टले टिकटक किन्ने प्रस्ताव राखेका थिए ।
तर, बाइटडान्सले भने यी प्रस्ताव अस्वीकार गरिदिएको थियो । बाइटडान्सको यो कदमले अब टिकटकमाथि प्रतिबन्ध लाग्ने सम्भावनालाई थप मजबुत गराएको थियो । टिकटकले नै अमेरिकामा नचल्ने गरी आफ्नो सिस्टम अपडेट गराएको छ ।
आफ्नो फोनमा टिकटक एप डाउनलोड गरिसकेका प्रयोगकर्ताहरूलाई असर नपर्ने बताइए पनि टिकटकको अपडेट भर्सन अमेरिकी नागरिकले पाउने छैनन् । यसकारण केही समयपछि टिकटक नै नचल्ने अवस्था आउन सक्छ । अर्कातिर टिकटकको वेब भर्सन पनि अमेरिकामा खुलेको छैन ।
अमेरिकी सञ्चार माध्यमका अनुसार प्रतिबन्ध लागू भएपछि अमेरिकामा गुगल र आइफोनको प्लेस्टोरबाट टिकटक एप डाउनलोड गर्न नसकिने भएको छ । साथै, प्रतिबन्धका कारण टिकटकका कुनै नयाँ अपडेटहरू पनि उपलब्ध हुनै छैनन् ।
रोचक कुरा त के छ भने, अमेरिकामा टिकटकमाथि प्रतिबन्ध लागेको भोलिपल्टै राष्ट्रपति जो बाइडेनको जिम्मेवारी पनि सकिँदैछ । प्रतिबन्ध आज (आइतवार) लागू हुनेछ भने त्यसको भोलिपल्ट अर्थात्, सोमबार राष्ट्रपति बाइडेनको कार्यकाल सकिनेछ । नयाँ राष्ट्रपति डोनाल्ड ट्रम्पले सोमबार नै जिम्मेवारी सम्हाल्दैछन् ।
टिकटकमाथि प्रतिबन्ध लगाउने विषय नयाँ राष्ट्रपतिको विवेकमा भर पर्ने ह्वाइट हाउसले यसअघि नै स्पष्ट पारिसकेको छ । त्यसैले, डोनाल्ड ट्रम्पको आगमनसँगै यसबारे के हुन्छ भन्ने स्पष्ट छैन । प्रतिबन्धबारे ट्रम्पले अहिले नै निर्णय गर्न नसकिने र राजनीतिक रूपमा यसको समाधान खोज्ने बताउँदै आएका छन् ।
यसअघि आफ्नो पहिलो कार्यकालमा ट्रम्पले टिकटकमाथि प्रतिबन्ध लगाउने संकेत गरेका थिए । तर, पछिल्लो समय भने ट्रम्प टिकटकमाथि प्रतिबन्ध लगाउन नहुने पक्षमा रहेको बताइन्छ ।
यसअघि ट्रम्पले आफ्नो राष्ट्रपतीय निर्वाचनमा टिकटकले निकै ठूलो सहयोग गरेको टिप्पणी गरेका थिए । त्यसैले, ट्रम्पले टिकटकमाथि लगाइएको प्रतिबन्ध फिर्ता लिने अथवा टिकटकलाई थप केही समय चल्न दिने सम्भावना रहेको विश्लेषण गरिएको छ ।
टिकटकले भने कानूनअनुसार अहिले अमेरिकामा टिकटक नचल्ने तर पछि चल्न सक्ने भन्दै आफ्ना प्रयोगकर्तालाई केही समय प्रतीक्षा गर्न अनुरोध गरेको छ । यता अमेरिकी टिकटक प्रयोगकर्ताले यो एपका कारण आफ्नो व्यापारमा फाइदा पुगेको र कतिलाई परिवार चलाउन पनि सहज भएको भन्दै टिकटक बन्द नगर्न आह्वान गरेका छन् ।
शुक्रवार टिकटकले एक भिडियो सन्देश पोस्ट गर्दै अमेरिकाको कानून मान्दै टिकटक नचल्ने हुन लागेको बताएको थियो ।
टिकटकले अमेरिकी राष्ट्रपति डोनाल्ड ट्रमले टिकटक प्रतिबन्धको समाधान खोज्नेबारे संकेत गरेकोप्रति आभार व्यक्त गर्दै अहिलेका लागि आफ्नो डाटा (भिडियो तथा तस्वीर लगायत) डाउनलोड गर्न दिने सुविधा पनि दिएको छ ।
यो खबर पढेर तपाईलाई कस्तो महसुस भयो ?
प्रतिक्रिया