कुन दिशा फर्केर लगाउने भाइटीका ? 

काठमाडौँ – भाइटीका लगाउने र लगाइदिने व्यक्ति कुन दिशामा फर्किने भन्ने कुराको पनि ख्याल गर्नुपर्छ । नेपाल पञ्चांग निर्णायक समितिले यस पश्चिम मोहडा गरेर भाइटीका लगाउनुपर्ने भनेको छ । 

भाइटीकामा दाजुभाइ कता फर्किने ? दिदीबहिनीले कुन दिशामा फर्केर लगाइदिने ? यो वर्षको भाइटीकामा दाजुभाइ पश्चिम र दिदीबहिनी पूर्व फर्किनुपर्ने नेपाल पञ्चाङ्ग निर्णायक विकास समितिका अध्यक्ष प्रा.श्रीकृष्ण अधिकारीले बताए।

‘वृश्चिक राशिमा भएकाले टीका लगाउने व्यक्ति पश्चिम फर्किँदा चन्द्रमा दाहिने पर्छ’, उनले भने, त्यसैले लगाइमाग्ने दाजुभाइ पश्चिम र लगाइदिने दिदीबहिनी पूर्व फर्किनुपर्छ।’

सनातन धर्ममा शुभकार्य गर्दा चन्द्रमाको दिशा हेर्ने परम्परा छ । आइतबार चन्द्रमा वृश्चिक राशिमा छ। शुभकार्य गर्दा चन्द्रमालाई अगाडि वा दाहिने पार्नुपर्छ।

चन्द्रमालाई अगाडि पार्ने क्रममा दाजुभाइ उत्तर फर्किँदा दिदीबहिनी दक्षिण फर्किएर टीका लगाउन नहुने भएकाले पूर्व-पश्चिम नै निर्देश गरेको अधिकारीले बताए।

चन्द्रमा अगाडि पार्न दाजुभाइले उत्तर फर्केर पनि टीका लगाउन सकिन्छ। यसो गर्दा दिदीबहिनी पूर्वतिर फर्किनुपर्छ। दक्षिण फर्किनु हुँदैन। दक्षिण दिशा पितृकर्मका लागि उपयुक्त मानिन्छ। शुभकार्यमा पूर्व वा उत्तर फर्किनुपर्ने मान्यता छ।