काठमाडौँ– विश्वभर लोकप्रियता कमाएका हलिउड मार्भल युनिभर्स फिल्मको क्रेज नेपालमा पनि उस्तै छ । नेपाली युवापुस्ता समय मिलाएर भए पनि मार्भल सिनेम्याटिक युनिभर्सका फिल्म हलसम्म पुग्ने गर्छन् । एउटा छुट्टै काल्पनिक दुनियाँ निर्माण गरेको मार्भल सिरिजका फिल्ममा सुपरहिरोको सुपरपावर देखाइने गरिन्छ ।
तिनै सुपरहिरोमध्ये स्पाइडर म्यान पात्र पनि निकै लोकप्रिय छ । मार्भल युनिभर्समा टम हल्याण्डले सोही सुपरहिरोको भूमिका निभाएका छन् । ‘स्पाइडर म्यान: होम कमिङ’ रिलिजपछि हल्याण्डलाई विश्वभर छरिएर रहेका फिल्मका दर्शकमाझ चिनाएको थियो । त्यसो त उनले मार्भल सुपरहिरोका अन्य फिल्ममा पनि अभिनय गरिसकेका थिए । तर, ती फिल्ममा मुख्य भूमिका भने थिएन ।
आज हामी उनै अभिनेता टम हल्याण्डका निजी जीवनबारे जानकारी दिँदैछौँ ।
हल्याण्डले ८ वर्षअघि क्याप्टेन अमेरिका सिभिल वारबाट मार्भल कमिक्स सुपरहिरो ‘स्पाइडरम्यान’ को भूमिका निभाउन थालेका थिए । त्यसबाहेक हलिउड अभिनेत्री जेन्दयासँगको सम्बन्धका कारण पनि उनी बारम्बार चर्चामा आउने गर्छन् ।
सन् १९९६ मा बेलायतको लण्डनमा जन्मेका हल्याण्डले सानै उमेरदेखि नै अभिनय थालेका थिए । तर, स्पाइडर म्यानको भूमिकाले भने उनको करिअरलाई अर्कै उचाइमा पुर्यायो । उनले स्पाइडर म्यानको अभिनय गरेका एभेन्जर्स एण्डगेम, एभेन्जर्स इन्फिनिटी वार र स्पाइडर म्यान नो वे होमले हलिउड बक्स अफिसमा पनि राम्रो कमाइ गरे । ती सबै फिल्मले १ अर्ब अमेरिकी डलरभन्दा धेरैको व्यापार गरेका थिए ।
भेराइटीका अनुसार स्पाइडर म्यानअघि उनको पारिश्रमिक औसत १० लाख डलर रहेको थियो । तर, मार्भलका फिल्मले १ अर्ब डलरभन्दा धेरै कमाइ गरेपछि भने उनको पारिश्रमिक ह्वात्तै बढेको छ ।
सन् २०२१ मा प्रकाशित भेराइटीको रिपोर्टअनुसार हाल भने उनको पारिश्रमिक कम बजेटको फिल्म भए २० देखि ५० लाख र ठूला स्टुडियोको फिल्म भए ५० लाख देखि १ करोड डलरसम्म पुगेको छ । अझै धेरै पैसा खर्च गर्न चाहने स्टुडियोबाट उनले प्रतिफिल्म २ करोड डलरसम्म पारिश्रमिक लिन्छन् ।
योबाहेक उनले मार्भल फिल्मले गर्ने कमाइबाट बोनससमेत प्राप्त गर्ने गरेका छन् । धेरै मानिसहरु टम हल्याण्ड र अर्का बेलायती अभिनेता टम हल्याण्डरसँग झुक्किन्छन् ।
केही समयअघि सेथ मायर्ससँगको कुराकानीका क्रममा हल्याण्डरले आफ्नो खातामा झुक्किएर हल्याण्डले पाउनुपर्ने ७ अंक बराबर बोनस आएको खुलाएका थिए । उनका अनुसार फिल्म स्टुडियोको लेखा प्रशासनले हल्याण्ड ठानेर उनको खातामा पैसा पठाइदिएको थियो ।
‘यो धेरै ठूलो परिमाणको पैसा थियो ।’ सेथ मायर्सलाई उनले भनेका छन्, ‘यो उनको पारिश्रमिक पनि थिएन । उनको त्यो पहिलो बक्स अफिस बोनस थियो ।’ त्यति धेरै पैसा आफूले अहिलेसम्म नदेखेको हल्याण्डले बताएका छन् ।
मार्भलबाहेक उनले अरु स्टुडियोका फिल्ममा पनि अभिनय गरेका छन् । सन् २०१७ मा उनले द करेन्ट वार नामक फिल्ममा अभिनय गरेका थिए भने सन् २०२० मा द डेभिल अल द टाइममा अभिनय गरेका थिए ।
त्यसैगरी, सन् २०२१ मा उनले दुई फिल्म खेले । उनले सन् २०२१ मा केहोस वाकिङ र चेरी नामक फिल्ममा अभिनय गरेका थिए । त्यसैगरी, उनले सन् २०१९ मा स्पाइज इन डिस्गाइस, सन् २०२० मा डुलिटिल, सन् २०२० मै अनवार्डमा पनि काम गरेका थिए ।
यीसँगै उनले सन् २०२२ मा अनचार्टेडमा अभिनय गरेका थिए । त्यो फिल्मले बक्स अफिसमा ४० करोड डलरभन्दा धेरै कमाइ गरेको थियो । हालै उनले एप्पल टिभीको मिनिसिरिज द क्राउडेड रुममा पनि काम गरेका छन् ।
यतिमात्रै होइन हल्याण्डले व्यवसायिक विज्ञापन तथा प्रायोजनका खातिर विभिन्न कम्पनीसँग पनि सहकार्य गरेका छन् । सन् २०२२ मा उनले इटालीको फेसन कम्पनी प्रदासँग सहकार्य गरेका थिए । त्यसैगरी, उनले कार कम्पनीहरु आउडी, ह्युण्डाइसँग पनि व्यवसायिक सहकार्य गरिसकेका छन् । उनले फाइनल फन्ट्यासी भिडियो गेम सिरिजको विज्ञापनमा समेत काम गरिसकेका छन् ।
त्यसैगरी, उनले अमेरिकाको प्रतिष्ठित जिम ब्राण्ड द डगपाउण्डमा पनि लगानी गरेका छन् । सन् २०२२ मा प्रकाशित द हलिउड रिपोर्टका अनुसार उनले अमेरिकाको न्यूयोर्क र लस एन्जल्समा रहेका जिममा लगानी गरेका छन् । उनले कति लगानी गरेका छन् भन्ने स्पष्ट नभएको पनि जनाइएको छ ।
लण्डनमा जन्मेर लण्डनमै हुर्केका हल्याण्डको अहिलेको स्थायी बसोबास पनि लण्डनमै छ । उनी आफ्ना दाजुभाइ साम र ह्यारीसँगै बस्छन् । साम सेफ हुन् भने ह्यारी फिल्म निर्माता हुन् । त्यसीगरी, उनको घरमा साम र ह्यारीसँगै टमका पुराना साथीहरु ह्यारिसन अस्टरफिल्ड र टुवाइन बारेट पनि बस्छन् ।
लण्डनमा रहेको उनको घरको मूल्य ३० लाख डलर बराबर रहेको बताइन्छ । उनले दुई वर्ष लगाएर आफ्नो घरको मर्मत पनि गरिसकेका छन् । घरको मर्मत गर्न पनि उनले दशौँ लाख डलर खर्च गरेको मिडियामा आएका समाचारमा उल्लेख गरिएको छ ।
साँच्चै भन्दा हल्याण्डको सबैभन्दा ठूलो सोख कार हो । उनको ग्यारेज अनेकौँ कार देख्न सकिन्छ । उनीसँग ल्याण्ड रोभर रेन्ज रोभर स्पोर्ट कार छ । जसको मूल्य ७० हजार डलरभन्दा धेरै छ । त्यसैगरी, उनीसँग भएको क्याडिलक एस्कलेडको मूल्य पनि ७७ हजार डलरभन्दा धेरै छ । आउडी आरएस ७ को भाउ १ लाख ३६ हजार डलरभन्दा धेरै रहेको छ भने आउडी आर८ को भाउ १ लाख ५० हजार डलरभन्दा धेरै छ ।
उनीसँग टेकन टर्बो एस छ । जसको मूल्य १ लाख ९६ लाख ५ सय डलरभन्दा धेरै रहेको छ । उनीसँग भएको रोल्स रोयस कुलिननको मूल्य भने ४ लाख १० हजार डलर रहेको छ ।
यति धेरै पैसा कमाउने हल्याण्डको दैनिकी भने निकै सहज र सरल तरिकाले बित्छ । उनी सामान्यतः बिहान ६ बजे उठ्छन् । त्यसपछि केही समय कसरत गर्छन् । कसरत गरिसकेर उनी नास्ता खान बस्छन् । उनको नास्तामा प्रायः अण्डा र फलफूल हुन्छन् । नास्तामा प्रायः उनी एग बेनेडिक्टका साथै इङलिश मफिन र अण्डा खाने गरेका छन् ।
त्यसपछि उनी आफूलाई अफर आएका विभिन्न फिल्मका स्क्रिप्ट पढ्न र अडिसनको तयारीका लागि बस्छन् । दिउँसोतिर उनी खाना खान बस्छन् । खानामा उनी प्रोटिनले भरिपूर्ण खानेकुरा खान रुचाउँछन् । उनको खानामा प्रायः ताजा तरकारी र मासु हुन्छन् । त्यसपछि हल्याण्ड साथीभाइसँगको भेटघाटमा व्यस्त हुन्छन्।
साँझतिर भने उनी अभिनयको अभ्यास गर्न रुचाउँछन् । बेलुकाको खानामा उनी मासु र आलुबाट बनेका खानेकुरा खान रुचाउँछन् । उनी जंकफूड पटक्कै खाँदैनन् । बारम्बार पानी पिइरहन्छन् । राति उनी फिल्म हेरेरमात्र सुत्छन् ।
यो खबर पढेर तपाईलाई कस्तो महसुस भयो ?
प्रतिक्रिया