फिल्म ‘छक्कापञ्जा ५’ को दोस्रो चरणको छायांकन सुरु

काठमाडौँ– फिल्म ‘छक्कापञ्जा ५’ को दोस्रो चरणको छायांकन शुक्रबारदेखि सुरु भएको छ । आगामी दशैंको फूलपातीमा प्रदर्शन तयारीमा रहेको फिल्मको दोस्रो चरणको छायांकन शुक्रबार बिहानदेखि काठमाडौंको जडिबुटी क्षेत्रमा छायांकन सुरु भएको हो ।

दोस्रो चरणमा १० प्रतिशत छायांकन पूरा हुने निर्माण टोलीले जनाएको छ । निर्माता तथा अभिनेता दीपकराज गिरीका अनुसार दोस्रो चरणमा केही गीत र भिडिओको छायांकन हुने छ । करिब एक सातामा छायांकनको काम सकिने उनले बताएका छन् ।

सोसल–कमेडी जनरामा बनिरहेको यो फिल्म छायाङ्कन अब पोस्ट–प्रोडक्सनमा जानेछ । यो फिल्म आमा सरस्वती मुभिज र आइएमईको प्रस्तुतिमा बन्न लागेको हो । कार्यकारी निर्माताको रूपमा निर्मल शर्मा समेत छन् ।