‘वर एन्ड बधू’को पोस्टरमा रोमान्टिक विवेक र आँचल

काठमाडौँ – भदौको १४ गतेबाट प्रदर्शनमा आउन लागेको फिल्म ‘वर एन्ड बधू’को तीन नयाँ पोस्टर रिलिज गरिएको छ । 

रोमान्टिक कमेडी जनरामा निर्माण भएको यो फिल्मको सार्वजनिक पोस्टरमा त्यही थिमलाई झल्काइएको छ । फलतः सार्वजनिक भएका तीनमध्ये दुई पोस्टरमा 

मुख्य नायिका आँचल शर्मा र नायक विवेक कर्माचार्यलाई रोमान्टिक अवतारमा देखाइएको छ । एक पोस्टरमा मात्रै फिल्मका अधिकांश कलाकारहरू अटाएका छन् ।

फिल्ममा आँचल र विवेकका अलावा विजय लामा, किरण केसी, रविन्द्र खड्का, सृष्टि खड्का, हिमेश पन्त, कुसुम शर्मा, दिनेश काफ्ले, सिता न्यौपाने, अंशु महर्जन, सरिता लामिछाने, गरिमा शर्मा लगायतका कलाकारहरूको अभिनय छ ।

मिलन चाम्सको निर्देशनमा तयार भएको यो फिल्म प्रदीप भारद्वाजले लेखेका हुन् ।  फिल्मका कार्यकारी निर्माता डाक्टर अमित रिजाल हुन् भने एलआरके इन्टरटेन्मेन्टको ब्यानरमा निर्माण भएको यो फिल्ममा जानुका थापाको लगानी छ ।