खाना खाँदा किन राम्रोसँग चपाएर खानुपर्छ ?

भनिन्छ खाना स्वाद लिई लिई बिस्तारै खानुपर्छ । यसो भन्दै गर्दा यसमा थपिने कुरा हो चपाई चपाई राम्ररी खानुपर्छ । तर धेरैले यो कुरालाई नजरअन्दाज गरिदिन्छन् ।

अझ भनूँ, राम्रोसँग चपाएर खानुपर्छ भन्ने कुरालाई त त्यति ध्यान नै दिँदैनन् । तर पाचन क्रियाको लागि यो धेरै महत्त्वपूर्ण कुरा हो ।

जब हामी पाचन क्रियाको कुरा गर्छौँ, यसको प्रसङ्ग पेटबाट सुरु हुन्छ भनेर बुझ्ने गर्छौँ । तर वास्तवमा खानेकुरा पेटमा नपुग्दै पाचन क्रिया सुरु भएको मानिन्छ ।

जब हामी मुखबाट खाना खान सुरु गर्छौँ, सँगसँगै पाचन क्रिया सुरु हुन्छ । खाना चपाउन सुरु गर्दा मुखमा र्‍यालसँगै पाचन इन्जाइम निस्केर खाना टुक्राउन सहज गर्ने गर्छ । आउनुहोस् आज राम्ररी चपाएर खाना खानुको फाइदाबारे जानौँ । 

– राम्रोसँग चपाएर खाने गर्दा खाना राम्रोसँग पच्छ र पाचन प्रक्रिया बलियो बन्न पुग्छ। अधिकांश रोग पेटको खराबीका कारण सिर्जना हुने भएकाले बढी चपाएर खाना खाने गर्नाले स्वास्थ्य राम्रो हुँदै जान्छ।

– यसरी खाने गर्दा खाना कम खाइन्छ। किनकि, चपाई–चपाई खाँदा पेट चाँडै अघाउँछ। यसले गर्दा स्वाभाविक रूपमा शरीरको वजन कम हुन जान्छ।

– राम्रोसँग चपाएर खाँदा भोक ढिलो गरी लाग्छ, जसले गर्दा शरीरको वजन बढ्न पाउँदैन। त्यही भएर वजन घटाउन चाहनेले थालमा थोरै खाना लिएर समय लगाएर चपाई–चपाई खाने बानी बसाल्नुपर्छ।

– राम्रोसँग चपाएर खाने गर्नाले खानामा रहेका प्रोटिन, क्याल्सियम, आइरन, भिटामिनलगायत पोषक तत्त्व हाम्रो शरीरमा राम्रोसँग घुल्न पाउँछन्। यसो भयो भने मोटाइँदैन। शरीर स्वस्थ र फिट रहन्छ।

– राम्रोसँग चपाएर खाँदा थोरै खानाबाट पनि शरीरले पर्याप्त पोषक तत्त्व पाउँछ। त्यही भएर खाद्यान्न सङ्कट आउन नदिन पनि हामीले बढी चपाएर खाने बानी बसाल्नुपर्छ।