भारतमा निर्मित आइफोनको निर्यात एकै वर्षमा दोब्बर

काठमाडौँ – भारतले मोबाइल निर्यातमा ठूलो फड्को मारेको छ । 

 समाचार अनुसार आइफोनको निर्यात दोब्बर भएको छ । भारतबाट एप्पलको आईफोन निर्यात २०२३–२४ मा १२.१ बिलियन अमेरिकी डलर पुगेको छ, जुन आर्थिक वर्ष २०२२–२३ मा ६.२ बिलियन अमेरिकी डलर थियो।

ट्रेड भिजनले जारी गरेको एक रिपोर्टले सो तथ्याङ्क बाहिरिएको हो ।  ट्रेड भिजनको प्रतिवेदन अनुसार आर्थिक वर्ष २०२३–२४ मा भारतबाट स्मार्टफोनको कुल निर्यात १६ अर्ब ५० करोड डलर पुगेको छ, जुन अघिल्लो आर्थिक वर्षमा १२ अर्ब अमेरिकी डलर थियो ।

प्रतिवेदनले यो वृद्धिले एप्पलको बढ्दो उपस्थिति, भारतीय उत्पादन इको सिस्टमको विकास र नवप्रवर्तनलाई बढवा दिने बृहत्तर प्रभावलाई प्रतिबिम्बित गरेको बताएको छ। 

भारतबाट एप्पलको आईफोन निर्यात आर्थिक वर्ष २०२२–२३ मा ६.२७ बिलियन डलरबाट बढेर २०२३–२४ मा १२.१ बिलियन डलर पुगेको छ, जुन लगभग शत प्रतिशत वृद्धि हो।

 कोरोनापछि भारतमा विश्वका ठूला कम्पनीको विश्वास बढेको छ । यसबाट भारतको अर्थतन्त्रले निरन्तर फाइदा उठाइ रहेको छ । धेरै उत्पादन एकाइ चीनबाट भारतमा सारिएको छ। एप्पलदेखि टेस्लासम्म धेरै ठूला कम्पनीहरूले लगातार भारतमा विश्वास व्यक्त गरिरहेका छन्।

 ट्रेड भिजन एलएलसीका अनुसार  भारतले अब एप्पलको विश्वव्यापी आपूर्ति शृङ्खलामा ठूलो भूमिका खेलिरहेको प्रष्ट भएको छ ।

 योसँगै अमेरिकी कम्पनी एप्पलले अब भारतमा आइफोनको क्यामेराका पार्टपुर्जा बनाउने तयारी गरिरहेको छ । इटी रिपोर्टका अनुसार एप्पलले मुरुगप्पा समूह र टाटा समूहको टाइटन कम्पनीसँग आईफोन क्यामेरा निर्माणका लागि वार्ता गरिरहेको छ। 

चीनमा आईफोन निर्माणको निर्भरता कम गर्नका लागि पनि यो कदम चालिएको हो । धेरै आईफोन मोडेलहरू हाल भारतमा भेला भएका छन्, तर क्यामेरा मोड्युलको लागि कुनै आपूर्तिकर्ता छैन।