काठमाडौँ– यस वर्ष प्रदर्शनमा आएर सर्वाधिक कमाइ गरेका सिनेमामा दयाहाङ राईले अभिनय गरेका सिनेमा अग्रपङ्तिमा छन् ।
एकपछि अर्को सिनेमामा व्यस्त दयाहाङलाई अहिले शूटिङका लागि समय मिलाउन समेत सकस परिरहेको छ । तर, उनी नाटकका कार्यक्रमदेखि क्रिकेट हेर्नसमेत समय छुट्याएका छन् ।
यस वर्ष उच्च कमाइ गरेको सिनेमा ‘जारी’ हो । यो सिनेमाले १७ करोड १७ लाख ग्रस कलेक्सन गरेको वितरकले बताएका थिए । नयाँ वर्षको उपलक्ष्यमा गत वैशाख १ गतेदेखि प्रदर्शनमा आएको यो सिनेमाले एक सय दिन मनाउन सफल भएको थियो । सिनेमामा दयाहाङ राईको शीर्ष भूमिका थियो ।
धेरै सिनेमामा अभिनय गरेको र उही शैलीको अभिनय गरेको भनेर बेलाबेला टिप्पणी हुने गरे पनि उनले अभिनय गरेका सिनेमाले वर्षकै सबैभन्दा धेरै कमाइ गर्नेदेखि विश्वका कैयन् फेस्टिभलमा उपस्थिति जनाए ।
नविन सुब्बाले निर्देशन गरेको दयाहाङ राई अभिनित सिनेमा ‘गाउँ आएको बाटो’ ले यस वर्ष राम्रो चर्चा कमायो । यो सिनेमा विश्वका विभिन्न महोत्सव (फेस्टिभल) मा सहभागी भयो । सिनेमाबाट दयाहाङको अभिनयको चर्चा नहुने कुरै भएन । नेपालका हलमा भने अझै रिलिज गरिएको छैन ।
यस्तै उनको शीर्ष भूमिका रहेको सिनेमा ‘नाङ्गो गाउँ’ ले पनि राम्रो कमाइ गर्यो । यो सिनेमामा दीपेन्द्र लामाको लेखन तथा निर्देशन देख्न सकिन्छ । निर्देशक लामाका अनुसार यो सिनेमाको दोस्रो सिक्वेलको तयारी समेत भइसकेको छ ।
यस वर्ष दयाहाङ राईका साथ जोडी बाँधिएकी अभिनेत्री मिरुना मगरले पनि एकसे एक हिट सिनेमा दिइन् । उनले दयाहाङसँग सिनेमा ‘जारी’ र ‘नाङ्गो गाउँ’ मा शीर्ष भूमिकामा अभिनय गरेकी थिइन् ।
यस्तै दयाहाङ राईले अभिनय गरेको सिनेमा ‘दिमाग खराब’ ले पनि समीक्षकको सकारात्मक प्रतिक्रियासँगै राम्रो व्यापारिक कलेक्सन गरेको थियो । यो सिनेमामा पनि दयाहाङको अभिनय छुटेको छैन ।
यस वर्ष हिट सिनेमामध्ये दयाहाङ राईले अभिनय गरेका सिनेमा हुन्– जारी, नाङ्गो गाउँ र दिमाग खराब ।
यस वर्ष व्यापारिक हिसाबले सफल सिनेमा ‘परदेशी २’ र ‘महाजात्रा’ मा भने उनको अभिनय थिएन ।
यो बाहेक उनको अभिनय रहेको सिनेमा ‘डिग्री माइला’ प्रदर्शनको तयारीमा छ । यो सिनेमामा पनि दयाहाङ राई र आँचल शर्माको जोडी छ । सिनेमालाई रामबाबु गुरुङले निर्देशन गरेका छन् । यो सिनेमा यही चैत्र ३० गतेदेखि प्रदर्शनमा आउँदैछ । यो सिनेमाले कस्तो व्यापार गर्नेछ भन्ने रिलिजपछि मात्र थाहा हुनेछ ।
यस वर्ष प्रदर्शनमा आएका दयाहाङका अन्य सिनेमाले भने त्यति राम्रो व्यापार गर्न सकेनन् । उनले अभिनय गरेका सिनेमा ‘दयारानी’, ‘हात्तीछाप’, ‘रङ्गेली’ लगायतका सिनेमाले भने राम्रो व्यापार गर्न सकेनन् ।
यो खबर पढेर तपाईलाई कस्तो महसुस भयो ?
प्रतिक्रिया