काठमाडौँ– गायक तथा अभिनेता प्रकाश सपूतले गत साता आफ्नो निर्माण तथा निर्देशनसमेत रहेको फिल्म ‘बसन्त’ मा समावेश गीत ‘साँझ पर्यो झमक्कै’ सार्वजनिक गरे । उक्त गीत रिलिज भएसँगै सामाजिक सञ्जालमा व्यापक चर्चा बटुल्यो ।
प्रकाश सपूत र शान्तिश्री परियारको स्वर रहेको गीतको भिडियोमा फिल्मका शीर्ष कलाकार प्रकाशसँगै स्वस्तिमा खड्काको अभिनय देख्न सकिन्छ । यो गीत रिलिज लगत्तै एकाएक चर्चाको शिखरमा पुगेको छ भने भिडियो शेयरिङ एप टिकटकमा पनि हजारौँ प्रयोगकर्ताले गीतमाथि भिडियो निर्माण गरेका छन् ।
भिडियोमा जात नमिले पनि मन मिलेका दुई जोडीको कथालाई देखाइएको छ । भर्खरै प्रेममा परेका प्रेमिल जोडीको कथा समेटिएको यो गीतमा युवकलाई भावुक र युवतीलाई केही चुलबुले चरित्रका रुपमा देखाइएको छ । भिडियोमा प्रकाश र स्वस्तिमाले जीवन्त अभिनय गरेका छन् भने गीतका शब्द पनि उत्तिकै दमदार छन् ।
प्रकाशका फ्यानले उनको कामको तारिफ गर्दै सामाजिक सञ्जाल रङ्ग्याएका छन् । युट्युबमा पनि प्रयोगकर्ताले यो गीत निकै मन परेको प्रतिक्रिया दिएका छन् ।
एक प्रयोगकर्ता युट्युबमा लेख्छन्, ‘प्रकाश सपूतको मयुजिक भिडियो कुनै फिल्मभन्दा कम हुँदैन भने फिल्म त कुरै नगरौँ ।’
यस्तै अर्का प्रयोगकर्ताले पनि ‘साँझ पर्यो झमक्कै’ को सिर्जनाको तारिफ गरेका छन् । बल बहादुर परियार लेख्छन्, ‘प्रकाश सपूतको प्रतिभा र क्षमतालाई सम्मान छ, गीत र भिडियो दुवै राम्रो लाग्यो ।’
अर्का एक प्रयोगकर्ताको भनाइ छ, ‘यो गीतले फेरि एकपटक देश खाने भयो, संगीतको दुनियाँमा धुम मच्चाउने भयो ।’
फिल्मको कुरा गर्नुपर्दा ‘बसन्त’ को कथा संगीत र निर्देशन प्रकाश सपूतले नै गरेका हुन् । यस्तै फिल्मको मुख्य सहायक निर्देशकमा प्रकाशका भाइ सुनिल विक देखिएका छन् । प्रकाश र स्वस्तिमाका अलावा खड्ग बहादुर पुन, प्रभात पाल, श्री शिभांसी, उर्मिला लाम्गादे लगायतका कलाकारको समेत अभिनय छ ।
फिल्मलाई मोहन विश्वकर्मा र विन्दु बोहोराले निर्माण गरेको यो फिल्मलाई आगामी चैत्र २२ गतेदेखि प्रदर्शनमा ल्याउने जनाइएको छ ।
यो खबर पढेर तपाईलाई कस्तो महसुस भयो ?
प्रतिक्रिया