अमेरिकामा हिम आँधी, ७ राज्यमा उच्च सतर्कता घोषणा

काठमाडौँ- अमेरिकामा आइतबारदेखि आएको भीषण हिम आँधीका कारण धेरै राज्यमा उच्च सतर्कता घोषणा गरिएको छ ।

यो आँधी पछिल्लो १० वर्षको सबैभन्दा खराब हुनसक्ने अनुमान गरिएकाले ७ राज्यमा उच्च सतर्कता घोषणा गरिएको हो । अमेरिकाका केन्टकी, भर्जिनिया, वेस्ट भर्जिनिया, कान्सास, अर्कान्सास र मिसौरीमा उच्च सतर्कता घोषणा गरिएको छ ।

राष्ट्रिय मौसम विभागले यो आँधीले अमेरिकाका ६ करोडभन्दा बढी मानिसको जनजीवन प्रत्यक्ष रूपमा प्रभावित पार्न सक्ने जनाएको छ । सामान्यतया न्यानो मौसम हुने फ्लोरिडामा पनि यतिखेर भारी हिमपात भइरहेको छ ।

अमेरिकी सञ्चारमाध्यमका अनुसार कन्सास र मिसौरी राज्यका लागि विशेष चेतावनी जारी गरिएको छ । राष्ट्रिय मौसम विभागका अनुसार यी दुई राज्यका धेरै क्षेत्रमा ८ इन्चसम्म हिमपात हुनसक्ने देखिएको छ भने अहिले पनि यहाँ ७२ किलोमिटर प्रतिघण्टाको गतिमा हावा चलिरहेको छ ।