काठमाडौँ– कवि राजेन्द्र ओझा ‘नयन’को कवितासङ्ग्रह ‘अभिलाषाका झारहरू’ विमोचन भएको छ ।
नेपाल प्रज्ञाप्रतिष्ठानमा शनिवार भएको कार्यक्रममा कवि ‘नयन’ सँगै प्रतिष्ठानका कुलपति भूपाल राई लगायतकाले कवितासङ्ग्रहको लोकार्पण गरेका हुन् । ‘नयन’को यो पहिलो साहित्यिक कृति हो ।
प्रतिष्ठान संस्कृति निर्माण गर्ने प्राज्ञिक थलो भएकाले साहित्यकार र लेखक माझ मात्र नभइ स्कुल,क्याम्पस र विश्वविद्यालयसामू प्रतिष्ठान परिचित हुनुपर्नेमा जोड दिँदै कुलपति राईले कवि तथा साहित्यकारहरू खास भ्रष्टाचारी नभएको उल्लेख गरे । उनले नयनको कवितासङ्ग्रह सरल र सहज रहेको समेत बताए ।
प्रतिष्ठानका प्राज्ञ परिषद् सदस्य तथा सामाजिकशास्त्र विभाग प्रमुख डा.कौशिला रिसालले कृतिमा भएका कविताहरू सरल र मौलिक शैलीमा रचना भएको सुनाइन् ।
उनका अनुसार कतिपय कवितामा वर्गीय विभेद, प्रेम र अध्यात्म जनाउने भाव छन् ।
पुस्तकमाथि समालोचक महेश पौडेलले कवि नयनमा कवित्वको प्रचुर सम्भावना रहेको सुनाउँदै कवितामा दार्शनिक प्रभाव समेत रहेको बताए ।
यो खबर पढेर तपाईलाई कस्तो महसुस भयो ?
प्रतिक्रिया