दुई दशकपछि ‘मेरी बास्सै’मा पुन: फर्किए इकु

काठमाडाैँ– ‘इकु’ नामबाट परिचित हास्य कलाकार सुलेमान शंकर करिब दुई दशकपछि हास्य सिरियल ‘मेरी बास्सै’ मा फर्किने भएका छन् । कलाकार शंकर १९ वर्षपछि मेरी बास्सैमा फर्किन लागेका हुन् ।

आफू यही शनिबारदेखि नै मेरी बास्सैको छायाँकनबाट काम सुरु गर्ने उनले जनाएका छन् । १९ वर्षअघि सीताराम कट्टेल (धुर्मुस) र केदार घिमिरे (माग्ने बुढा)को निर्देशनमा उनल मेरी बास्सैमा काम गरेका थिए । केही एपिसोडमा मात्रै काम गरेपनि उनी चर्चित हुनुका साथै दर्शकले रुचाएकासमेत थिए ।

मेरी बास्सैबाट बाहिरिएपछि कलाकार शंकरले इकु र इकु २ फिल्म निर्माण गरेका थिए । तत्कालीन समयमा दर्शकले आफ्नो क्यारेक्टरलाई धेरै रुचाएको र पुन सिरियलमा जोडिन पाएकोले आफू निकै खुसी रहेको उनले जानकारी दिएका छन् ।
आगामी शनिबारदेखि इकु सिरियलमा नियमित रुपमा देखा पर्ने निर्माताले जनाएको छ । नियमित देखा पर्नको लागि आवश्यक तयारी भइरहेको उनको भनाइ छ ।

इकु केही समय अघि हास्य सिरियल हल्का रमाइलोमा देखा परेका थिए । केही एपीसोडमा देखा परेका उनी अहिले भने छैनन् ।

नेत्र रावतको लेखन तथा निर्देशनमा रहेको यो सिरियल हरेक मंगलबार बेलुकी ८ः५० बजेबाट नेपाल टेलिभिजनमा प्रशारण हुँदै आएको छ। मिडिया हब युट्युबमा ९ः३० बजे स्ट्रिमिङ हुने गरेको छ।