अभिनेत्री छिरिङले गरिन् सगरमाथाको आरोहण

काठमाडौँ – अभिनेत्री छिरिङ शेर्पाले सर्वोच्च शिखर सगरमाथाको सफल आरोहण गरेकी छन् । उनले ‘माई भ्वाइस फर शेर्पा क्लाइम्बर्स’ नाराका साथ मंगलबार सगरमाथा आरोहण गरेकी हुन् ।

 छिरिङले पासाङ ल्हामु फाउन्डेसनबाट हिमाल चढेकी हुन् । दर्जन म्युजिक भिडियोमा समेत अभिनय गरिसकेकी छिरिङ शेर्पा समुदायकी पहिलो अभिनेत्री पनि हुन् । 

शेर्पा फिल्म ‘तिन्छेन फामा’मा अभिनय गरेकी उनले फिल्म ‘कार्साङ’मार्फत नेपाली रजतपटमा डेब्यू गर्दै छिन् । फिल्म ‘तिन्छेन फामा’ले पूर्व राष्ट्रपति विद्यादेवी भण्डारीबाट अवार्ड पनि पाएको थियो । 

उनी टेलिभिजन रियालिटी शो ‘डान्सिङ स्टार नेपाल सिजन २’को विजेतासमेत हुन् । छिरिङसँग शेर्पा समुदायको सौन्दर्य प्रतियोगिता आयोजनाको अनुभव पनि छ ।

छिरिङले यसअघि सोलुखुम्बुको कालापत्थरमा सर्वाधिक उचाइमा नृत्यको रेकर्ड राख्दै गिनिज बुक अफ वर्ल्ड रेकर्डमा नाम दर्ता गराएर राष्ट्रपति रामचन्द्र पौडेलबाट ‘गिनिज बुक अफ वर्ल्ड रेकर्ड’को प्रमाणपत्र लिएकी छन् ।