गर्मीमा घामले गर्दा छालामा धेरै समस्या देखा पर्छन् । चर्को घामले छाला डढ्ने, मेकअप बग्ने, पसिना बढी आउने, चिलाउने लगायत अनेकौँ समस्या पनि देखा पर्छन्।
गर्मीले सबैभन्दा बढी असर महिलाको मेकअपमा पार्छ । गर्मी मौसममा मेकअप धेरै समयसम्म टिक्न गाह्रो हुन्छ । केही कुरामा ध्यान राख्न सके गर्मीबाट हुने समस्याबाट जोगिन सकिन्छ ।
–गर्मी मौसममा छालाको स्याहार गर्न गाह्रो हुन्छ । पसिनाले गर्दा छाला चिपचिप हुने र मेकअप पनि धेरै समयसम्म नटिक्ने हुन्छ । तैलीय छाला भएकाले गर्मीमा झन् समस्या भोग्नुपर्छ । यस्तो समस्याबाट जोगिन सकेसम्म पूरा बाहुला भएको पहिरन लगाउनुपर्छ । यसले शरीरको देखिने भागलाई घामबाट डढ्नबाट जोगाउँछ ।
–गर्मीमा सेतो वा हल्का रङका पहिरनको प्रयोग उचित हुन्छ । साथै सकेसम्म कम एसेसरिजको प्रयोग गर्नुपर्छ । सनग्लास गर्मीमा नभई नहुने एसेसरिज हो । दिनमा सनग्लासको प्रयोग गरे पनि साँझसम्म निकाल्नुपर्छ ।
कपाललाई धेरै कसेर बाँध्नु हुँदैन । कसेर बाँधेको कपालमा चिपचिपको समस्या बढी देखिन्छ । गर्मीमा कपाल भरसक छोटो राखेको नै राम्रो । छोटो कपाललाई स्याहार्न सजिलो हुन्छ । र, तपाईँ कूल देखिन सक्नुहुने छ ।
–गर्मीमा कपाल झर्ने समस्याले पनि त्यत्तिकै सताउँछ । धेरै कपाल झरेमा नियमित तेल मालिस गर्ने र कपालमा दहीको प्रयोग पनि गर्न सकिन्छ । कपालमा हाँगा फाट्ने समस्या पनि त्यस्तै देखिन्छ । त्यसका लागि २० दिनको अन्तरालमा कपाललाई एक पटक ट्रिमिङ गर्ने ।
कपाललाई स्याम्पुले धोएपछि कागतीको रस वा गुलाबजल मिलाएको पानीले धुने । यसो गर्दा कपालमा पसिनाको गन्ध आउँदैन । यदि टाउको चिलाउने समस्या भयो भने छालारोग विशेषज्ञसँग सम्पर्क राख्नुपर्छ । गर्मीमा नियमित कपालमा स्याम्पु गर्नुपर्छ ।
–गर्मीमा धेरैभन्दा धेरै पानी पिउनुपर्छ । पानी पिउनाले शरीरको विषादी पसिना र पिसाबबाट बाहिर निस्कन्छ । गर्मी मौसममा वाटरप्रुफ मेकअपको प्रयोग गर्नुपर्छ । कामकाजी महिलाले यो मौसममा हल्का मेकअप गर्नु नै राम्रो हुन्छ ।
–गर्मीमा न्युड लिपस्टिक प्रयोग गर्नुपर्छ । पारदर्शी गुलाबी लिपस्टिक र डिप स्मोकी आई मेकअपले आँखालाई राम्रो र कूल लुक दिन्छ ।
गर्मीमा मस्काराको प्रयोगले आँखामा भारीपन महसुस गराउँछ । बढी गर्मी भयो भने यो बग्छ पनि । यसो हुन नदिन कृत्रिम आइलेसेज प्रयोग गर्न सकिन्छ ।
यो खबर पढेर तपाईलाई कस्तो महसुस भयो ?
प्रतिक्रिया