अजय देवगन र रितेश देशमुखको ‘रेड २’ सय करोड क्लबमा प्रवेश

मुम्बई – बलिउड स्टार अजय देवगन र रितेश देशमुख अभिनित बहुप्रतीक्षित थ्रिलर फिल्म ‘रेड २’ ले बक्स अफिसमा धमाकेदार सुरुवात गर्दै रिलिजको छैटौं दिनमै १०८.६५ करोड रुपैयाँ कमाउँदै सय करोड क्लबमा प्रवेश गरेको छ।

यो फिल्म २०२५ मे १ (वैशाख १९) मा विश्वव्यापी रूपमा रिलिज भएको हो। ‘रेड २’ ले दक्षिण भारतीय ब्लकबस्टरहरू ‘रेट्रो’ र ‘हिट ३’ साथै बलिउडको ‘भूतनी’ जस्ता प्रतिस्पर्धी फिल्महरूसँग कडा टक्कर दिँदै उल्लेखनीय प्रदर्शन गरेको छ।

सैकनिल्कको रिपोर्ट अनुसार, फिल्मले मंगलबार ६.७५ करोड रुपैयाँ कमाउँदै भारतभित्र मात्र कुल नेट कलेक्सन ८५.५० करोड रुपैयाँ पुर्‍याएको छ। यसले फिल्मलाई न केवल ‘केशरी २’ (८१.७९ करोड) जस्तो सुपरहिट फिल्मको रेकर्ड तोड्न सफल बनायो, तर ‘जाट’ (८७.६१ करोड) सँगको कमाइको अन्तर पनि घटाउँदै प्रतिस्पर्धात्मक स्थानमा पुर्याएको छ।

बुधवारसम्ममा, ‘रेड २’ ले ‘जाट’ लाई उछिन्दै बलिउडमा यो वर्षको चौथो सर्वाधिक कमाइ गर्ने फिल्मको स्थान हासिल गरेको छ। अब यो फिल्मका अगाडिका मुख्य प्रतिस्पर्धी भनेका ‘सिकिन्दर’ र ‘स्काई फोर्स’ जस्ता चर्चित फिल्महरू रहेका छन्।

‘रेड २’ को यस व्यावसायिक सफलताले मात्र होइन, समीक्षक र दर्शक दुवैबाट पाएको सकारात्मक प्रतिक्रियाले पनि फिल्मको लोकप्रियतालाई थप उचाइमा पुर्‍याएको छ। दर्शकहरूले अजय देवगन र रितेश देशमुखको दमदार अभिनय र कथावस्तुलाई निकै रुचाएका छन्।