शाहरुखले जिते १३ वर्ष पुरानो आयकर विवाद मुद्दा 

काठमाडौं। बलिवुड सुपरस्टार शाहरुख खानले आयकरसँग सम्बन्धित मुद्दामा ठूलो जित हासिल गरेका छन्।

भारतको आयकर पुनरावेदन न्यायाधिकरणले आर्थिक वर्ष २०११-१२ को लागि आयकर विभागद्वारा सुरु गरिएको पुनर्मूल्यांकन कार्यवाहीलाई रोक लगाएको छ।

यो मुद्दा फिल्म ‘रावन’ को कमाईमा बेलायतमा तिरेको कर क्रेडिटसँग सम्बन्धित छ । शाहरुख र रेड चिलीज इन्टरटेनमेन्ट बीचको सम्झौता अनुसार, फिल्मको ७० प्रतिशत छायांकन बेलायतमा हुने भनिएको थियो । त्यसकारण ७० प्रतिशत आम्दानी विदेशमा भएको मानिन्थ्यो, जुन बेलायती करको अधीनमा थियो । यसमा होल्डिङ कर पनि समावेश थियो ।

खानले यस फिल्मबाट ८३.४२ करोड भारु आम्दानी घोषणा गरेका थिए । बेलायतमा तिरेको कर क्रेडिटको लागि उनको दाबी करदाताले अस्वीकार गरेका थिए । आम्दानीको पुनर्मूल्यांकन ८४.१७ करोड रुपैयाँ गरिएको थियो । यो पुनर्मूल्याङ्कन सम्बन्धित मूल्याङ्कन वर्ष (२०१२–१३) को अन्त्यबाट चार वर्षभन्दा बढी समय पछि गरिएको थियो ।

खानले आफ्नो मूल आयकर रिटर्नमा विदेशी कर क्रेडिट दाबी गरेका थिए, जसलाई आयकर अधिकारीले अस्वीकार गरेका थिए । तर अब आयकर पुनरावेदन न्यायाधिकरणले शाहरुख खानविरुद्ध कुनै प्रमाण फेला नपरेपछि कारवाहीलाई रोक लगाएको भारतीय मिडियाहरुले उल्लेख गरेका छन् ।

शाहरुख खानलाई बेलायती कम्पनी विनफोर्ड प्रोडक्सन मार्फत भुक्तानी गरिएको थियो । कर अधिकारीहरूले भुक्तानी व्यवस्थाले भारतलाई राजस्व गुमाउनु परेको जिकिर गरेका थिए ।