मस्कले यूएसएआईडीको ‘मृत्यु’ हुने बेला भएको भनेपछि खैलाबैला, शुक्रबारदेखि कर्मचारीलाई बिदामा राखिने

काठमाडौँ- केही दिनयता बन्द रहेको अमेरिकी अन्तर्राष्ट्रिय सहयोग नियोग यूएसएआईडीको वेबसाइट पुनः सञ्चालनमा आएको छ । हालै सञ्चालनमा आएको उक्त वेबसाइटमा सानो सूचना सार्वजनिक गरिएको छ ।

उक्त सूचनामा यूएसएआईडीले फेब्रुअरी ७ अर्थात् आगामी शुक्रबारबाट संस्थाका अधिकांश कर्मचारीलाई रातिबाट बिदामा राखिने उल्लेख गरिएको छ । सूचनामा यूएसएआईडीले आवश्यक थोरै संख्यामा कर्मचारीलाई यथावत राखेर बाँकीलाई बिदामा राखिने जनाएको हो ।

“शुक्रबार, फेब्रुअरी ७, २०२५, राति ११ः५९ बजे मिसनका लागि महत्वपूर्ण कार्य, कोर नेतृत्व र विशेष कार्यक्रमको जिम्मेवारी पाएका निश्चित कर्मचारीबाहेक विश्वभर यूएसएआईडीले प्रत्यक्ष नियुक्त गरेका सबै कर्मचारीहरूलाई प्रशासनिक बिदामा राखिनेछ । काम गरिरहने अपेक्षा गरिएका आवश्यक कर्मचारीहरूलाई एजेन्सी नेतृत्वले बिहीबार, फेब्रुअरी ६, दिउँसो ३ बजे सम्ममा सूचना दिनेछ,” यूएसएआईडीको सूचनामा उल्लेख छ ।

अमेरिकी राष्ट्रपति डोनाल्ड ट्रम्पले यूएसएआईडीको सहायता तीन महिनाका लागि रोक्न र समीक्षा तथा पुनरवलोकन गर्न आदेश गरेपछि यस्तो सूचना जारी गरिएको हो ।

उता ट्रम्प प्रशासनको चुस्तता विभागका प्रमुखको जिम्मेवारी पाएका इलोन मस्कले यूएसएआईडी एक ‘आपराधिक संस्था’ भएको भन्दै यसको ‘मृत्यु’ हुने बेला भएको टिप्पणी गरेका छन् ।

अमेरिकाको ४७ औँ राष्ट्रपतिका रुपमा शपथ ग्रहण गरेलगत्तै ट्रम्प वैदेशिक सहायताको विपक्षमा खडा भएका छन् ।