आजदेखि प्रदर्शनमा आयो प्रदीप खड्काको फिल्म ‘एक्टर: टेक वान’

काठमाडौँ–  प्रदीप खड्का स्टारर फिल्म ‘एक्टरः टेक वान’ आजदेखि प्रदर्शनमा आएको छ । माघ १६ गतेदेखि प्रदर्शनमा आउने भनिएको यो फिल्म कानूनी झमेलाका कारण पूर्वनिर्धारित मितिको दुई दिनपछि प्रदर्शनमा आएको हो ।

प्रदीप खड्काका अलावा राजवल्लभ कोइराला, आना शर्मा, दिव्या रायमाझी लगायतका कलाकारको समेत अभिनय रहेको यो फिल्म रिलिजअघि चर्चामा छ । यसअघि गरिएको प्रिमियर शो मा पनि फिल्मले सकारात्मक प्रतिक्रिया पाएको छ ।

यो फिल्मबाट दिव्या रायमाझीले रजतपटमा डेब्यु गर्दैछिन् भने पुराना अभिनेता राजबल्लभ कोइरालाले कमब्याक गर्दैछन् । फिल्मलाई राजन भुसालले निर्देशन गरेका हुन् । यस्तै थमन कुमार भण्डारीले निर्माण गरेका हुन् ।

गत आइतवार सोही नामसँग मिल्दो अर्को फिल्म ‘एक्टर’ का निर्माताले ‘एक्टरः टेक वान’ को प्रदर्शन मिति रोक्न भन्दै जिल्ला अदालत काठमाडौँमा रिट दायर गरेका थिए । त्यसपछि अदालतले फिल्मको प्रदर्शन मिति रोक्न अन्तरिम आदेश जारी गरेको थियो ।

फिल्मकर्मीले उस्तै नाम गरेका दुई वटा फिल्मलाई चलचित्र विकास बोर्डले दर्ता गरेको भन्दै बोर्डको दोष भएको बताएका थिए । साथै उनीहरुले फिल्मकर्मी मिलेर अगाडि बढ्न पनि अनुरोध गरेका थिए । त्यसपछि बिहीवार दुवै फिल्मका निर्माताबीच वार्ता गरी अदालतको मुद्दा फिर्ता लिने सहमति भएको थियो ।