काठमाडौँ- पछिल्लो समय प्रविधिको क्षेत्रमा तीव्र विकास भएसँगै ‘वेरएबल’ डिभाइसको प्रयोग पनि बढ्दै गइरहेको छ । पछिल्लो समय वेरएबल डिभाइसका रुपमा स्मार्टवाचको प्रयोग बढ्दो छ ।
स्मार्टवाच मात्रै होइन, धेरैले अहिले स्मार्ट ग्लास, स्मार्ट रिङजस्ता वेरएबल डिभाइसको प्रयोग पनि गरिरहेका छन् । तर, शायद सबैभन्दा चर्चामा रहेको वेरएबल डिभाइस चाहीँ अमेरिकी प्रविधि कम्पनी एप्पलले विकास गरेको एप्पल भिजन प्रो नै हो ।
एप्पलले विकास गरेको एप्पल भिजन प्रो नामक ‘मिक्स्ड रियालिटी’ हेडसेट अहिले निकै लोकप्रिय छ । एप्पलले सन् २०२४ को शुरुवातमा यो ग्याजेट बजारमा ल्याएको थियो ।
झट्ट हेर्दा स्की गगल्सजस्तो देखिने यो हेडसेटले अगमेन्टेड रियालिटी र भर्चुअल रियालिटी दुबै सपोर्ट गर्छ । अगमेन्टेड रियालिटी यस्तो प्रविधि हो जसमा हाम्रो आसपासको दुनियाँ भर्चुअल रुपमा देख्न सकिन्छ ।
यस्तो अवस्थामा हेडसेटको स्क्रिनमा मिश्रित वास्तविकता देखिन्छ, जसमा वास्तविक र भर्चुअल वातावरण देखा पर्छ । यो हेडसेटका माध्यमबाट भर्चुअल रुपमा चलचित्र हेर्न, एप्पलका एपहरू प्रयोग गर्न र डकुमेन्ट लेख्न र रिड गर्न सकिन्छ ।
यसमा दुई वटा चिपसेट जडान गरिएको छ । यसमा जडान गरिएको एम २ चिपले प्राथमिक प्रोसेसरको रुपमा काम गर्छ भने आर १ चिपले वास्तविक समयमा विभिन्न सेन्सरबाट उपलब्ध डेटाहरू संकलन गरी त्यही अनुसार ग्याजेट चलाउन डिभाइसलाई व्यवस्थापन गर्न सक्छ ।
दुवै आँखाका लागि यसमा दुई ओटा माइक्रो ओलेड डिस्प्ले जडान गरिएको छ । यी डिस्प्ले फोरके रेजोलुसनभन्दा राम्रो रहेको एप्पलले जनाएको छ । डिस्प्लेमा २ करोड ३० लाखभन्दा धेरै पिक्सेल कम्बाइन गरिएको छ । आवाज सुन्नका लागि दुवै कानको छेउतिर स्पिकर राखिएको छ ।
हेडसेटको बाहिरतिर विभिन्न किसिमका सेन्सरहरु जडान गरिएका छन् । ती सेन्सरहरूले प्रयोगकर्ता आसपासको वातावरणको विश्लेषण गरी त्यसलाई स्क्रिनमा देखाउँछ । प्रयोगकर्तालाई उत्कृष्ट मिक्स्ड रियालिटीको अनुभव दिलाउनका लागि एप्पल भिजन प्रोमा कुल १२ क्यामेरा, ५ सेन्सर र आधा दर्जनभन्दा धेरै माइक्रोफोन जडान गरिएको छ ।
यी सबै सेन्सरका माध्यमबाट प्रयोगकर्ताको आसपास भइरहेका गतिविधि एकै ठाउँमा हेर्न सकिन्छ । हेडसेटका माध्यमबाट इन एअर टाइपिङ, भ्वाइस रिकग्निशन, ह्याण्ड ट्राकिङ र अरु नवीन प्रविधिको अनुभव लिन सकिन्छ ।
एप्पलको भिजन प्रो हेडसेटमा भने कुनै किसिमका कन्ट्रोलर छैनन् । अर्थात भौतिक रूपमा बटनहरू छोएर डिभाइस कन्ट्रोल गर्ने सुविधा यसमा छैन । कम्पनीका अनुसार यसलाई पूर्ण रूपमा आँखा, आवाज र हातको चालद्वारा नियन्त्रण गर्न सकिन्छ ।
त्यसैगरी, अनुहारको अगाडि औंला चलाएर हेडसेटलाई आफ्नै तरिकाले नियन्त्रण र प्रयोग गर्न पनि सकिन्छ । यसलाई प्रयोगकर्ताको आँखाको चालले समेत नियन्त्रण गर्न सकिन्छ । ग्लास, मेटल र फेब्रिकबाट निर्माण गरिएको यो हेडसेट प्रयोगकर्ताले सहजै लगाउन सक्ने एप्पलको दाबी छ ।
अप्टिक आइडी फिचरले प्रयोगकर्ताको आँखाको रेटिनालाई विश्लेषण गरेर डिभाइस अनलक गर्छ । सुरक्षाका लागि यसमा फिङ्गरप्रिन्ट सेन्सर पनि छ ।
एप्पल भिजन प्रोमा म्यागसेफ रिचार्जेबल ब्याट्री जडान गरिएको छ । यसको ब्याट्री ब्याकअप २ घण्टासम्म चल्न सक्छ । चार्ज गर्दै हेडसेट चलाउन पनि सकिन्छ । यस हेडसेटमा एप्पलको भिजन ओएस नामक अपरेटिङ सिस्टम प्रयोग गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया