लस एन्जल्सको डढेलोबाट जोगिइन् बलिउड अभिनेत्री नोरा फतेही

काठमाडौँ- अमेरिकाको लस एन्जल्समा भएको आगलागीबाट सयौँ भवन ध्वस्त भएका छन् भने १ लाख ३० हजारभन्दा बढी मानिस आफ्नो घर छाड्न बाध्य भएका छन् । आगो निभाउन छिमेकी राज्यबाट गएका दमकलको समेत प्रयोग गरिएको छ । अहिले सम्म डढेलो नियन्त्रणमा आउन सकेको छैन ।

मङ्गलबारदेखि प्यासिफिक पालिसेड्समा लागेको विनाशकारी आगलागी तीव्र गतिमा फैलिएको छ र यसले १५ हजार एकडभन्दा बढी क्षेत्रमा विनाश निम्त्याइसकेको छ । यो स्थान सेलिब्रेटीहरूको बसोबार गर्ने क्षेत्र हो ।

धेरैजसो हलिउड सेलिब्रेटीहरू यो स्थानमा बस्छन् । सोही क्रममा बलिउड अभिनेत्री नोरा फतेही पनि त्यहाँको जङ्गलको आगोबाट जोगिएकी छिन् । अहिले उनी त्यहाँको घर छोडेर भागेकी छिन् । अभिनेत्री नोराले भिडियो सेयर गरेर यसबारे जानकारी दिएको हुन् ।

उनले आफ्नो इन्स्टाग्राममा दुईवटा भिडियो पोस्ट गरेकी छिन् । पहिलो भिडियोमा उनले जंगलमा लागेको आगो देखाइरहेकी छिन् भने दोस्रो भिडियोमा उनले कसरी आफूले आफ्नो सबै सामानहरू तुरुन्तै प्याक गरेर ज्यान बचाउनका लागि भागेको बताएकी छिन् ।

नोरा फतेहीले भिडियो सेयर गर्दै भनिन्, ‘म लस एन्जल्समा छु र जंगलमा लागेको आगो निकै भयानक छ । मैले यस्तो पहिले कहिल्यै देखेको थिइन र छैन पनि, यो आगो भयंकर विनाशकारी छ । हामीले यहाँबाट ५ मिनेट अघि मात्रै स्थान छाडने आदेश पायौं, त्यसैले मैले चाँडै मेरा सबै सामानहरू प्याक गरे र मैले यो क्षेत्र छाडे ।’