पुष्पा २ को कमाइ कति ?

काठमाडौँ- बलिउडका दुई सुपरस्टार शाहरुख खान र सलमान खानको फिल्म सधै चर्चामा रहन्छ । उनका फिल्मले पनि बक्स अफिसमा राम्रो कमाइ गर्छन् । शाहरुख खान र सलमान खानको फिल्मले कमाईको हिसाबले बक्स अफिसमा धेरै रेकर्ड बनाएका छन् ।

तर अहिले अल्लु अर्जुनको फिल्म ‘पुष्पाः २’ ले अहिले बक्स अफिसमा यस्तो कीर्तिमान बनाएको छ, जसबाट दुवै खानका फिल्महरु पछाडि परेका छन् । पुष्पा २ ले हिन्दी भाषामा पनि राम्रो कमाइ गरेको छ ।

‘पुष्पा २’ हिन्दी भाषामा सबैभन्दा धेरै कमाउने फिल्म बनेको छ । अल्लु अर्जुन र रश्मिका मन्दानाको यो फिल्मले हिन्दी भाषामा ७०० करोडभन्दा बढी कमाइसकेको छ । यति मात्र होइन, अल्लु अर्जुन, रश्मिका मन्दना र फहद फासिल अभिनित यो फिल्म २०२४ को दोस्रो सबैभन्दा धेरै कमाउने फिल्म बन्नबाट केही कदम मात्र टाढा छ।

बितेका १९ दिनमा ‘पुष्पा २ः द रुल’ले हिन्दी भाषामा ७०४.२५ करोड कमाएको छ । बाहुबलीः २ (हिन्दी), जवान, गदरः २ र एनिमल जस्ता ठूला फिल्महरूलाई पछि पार्दै यसले हिन्दी भाषामा ३ हप्तामा सबैभन्दा धेरै कमाइ गरिसकेको छ ।