बलिउडमा अभिनेत्री सामन्थाको चर्चा

मुम्बई– दक्षिण भारतीय अभिनेत्री सामन्था रुथ प्रभु अहिले आफ्नो वेब सिरिज ‘सिटाडेलसः हनी बन्नी’ का कारण चर्चामा छिन् । यो सिरिजमा उनीसँगै वरुण धवन पनि शीर्ष भूमिकामा छन् ।

यी दुईको जोडीलाई दर्शकले निकै रुचाएका छन् । यति मात्र होइन, उनको सिरिजले अहिले ओटीटीमा कब्जा जमाएको छ । अमेजन प्राइमको यो वेब सिरिजलाई विश्वभरका दर्शकहरुले मन पराइरहेका छन् । यो सिरिज ओटीटीको ट्रेन्डिङ नम्बरमा समेत परेको छ ।

अरमाक्स मिडियाले गरेको सर्वेक्षणको छनोटमा ‘भारतीय सबैभन्दा लोकप्रिय अभिनेत्री’को सूचीमा सामन्थाले दीपिका पादुकोण, आलिया भट्ट, नयनतारा लगायतका अभिनेत्रीलाई पछाडि पार्दै पहिलो स्थान हासिल गरेकी छिन् ।

गत अक्टोबर महिनामा गरिएको सर्वेक्षण अनुसार आलियाले दोस्रो स्थान पाउँदा नयनतारा तेस्रो र दीपिका चौथो नम्बरमा परेकी छिन् । पाँचौदेखि १० औं नम्बरमा क्रमशः त्रिशा कष्णन, काजल अग्रवाल, श्रद्धा कपुर, साइ पल्लभी, रश्मिका मण्डन र कैटरिना कैफ छन् ।

सामन्थ सन् २०२१मा पति नागा चैतन्यसँग अलग भएकी थिइन् । सिने उद्योगमा लोकप्रिय मानिए पनि यी दुई अलग भएपछि अनेक टिकाटिप्पणी र अनगिन्ती अफवाह फैलिएका थिए । यस विषयमा भने दुवैजना चुप रहे ।

उनीहरुले आफ्नो सम्बन्धबारे केही कुरा बाहिर ल्याएनन् । अभिनेता नागा भने ४ डिसेम्बरमा शोभिता धुलिपालासँग विवाह बन्धनमा बाँधिदै छन् ।

यी दुईको विवाहका लागि हल्दी रसमसँगै अन्य समारोह शुरु भइसकेका छन् ।