यी हुन् सन् २०२५ मा रिलिज हुने बहुप्रतीक्षित बलिउड फिल्म

काठमाडौँ– सन् २०२५ मा केही भारतीय फिल्मले बक्स अफिसमा उत्साहजनक व्यापार गर्ने अनुमान गरिएको छ । दक्षिण भारतीय फिल्म र बलिउडका केही फिल्मको दर्शकले लामो समयदेखि प्रतीक्षा गरिरहेका छन् ।

त्यसो त केही बलिउड फिल्मले यो वर्ष पनि उत्साहजनक व्यापार गरेका छन् भने कतिले त अनेक रेकर्ड नै कायम गरेका छन् । बलिउडमा पछिल्लो समय हरर कमेडी जनराका फिल्मले दर्शकको मन जितेका छन् ।

सन् २०२५ मा भने एक्सन फिल्मले बक्स अफिसमा कमालको व्यापार गर्ने आँकलन गरिएको छ । त्यति मात्र होइन, केही फिल्मले बक्स अफिसमा अनेक रेकर्ड तोड्ने प्रक्षेपण समेत गरिएको छ । यस वर्ष कुन कुन फिल्म प्रतीक्षित छन् त? यसबारेमा चर्चा गरौँ ।

टक्सिक

भारतमा ‘टक्सिक’ लाई प्रतीक्षित फिल्मका रूपमा हेरिएको छ । एक्सन थ्रीलर जनरामा निर्माण हुने यो फिल्मको लगानी पनि निकै महङ्गो भएको बताइएको छ । दक्षिण भारतीय यो फिल्ममा पछिल्लो समयका लोकप्रिय स्टार यशको शीर्ष भूमिका रहनेछ भने कियारा आडवाणी, श्रुती हसन, नयन तारा लगायतका कलाकारको समेत अभिनय रहनेछ । यो फिल्म सन् २०२५ को अप्रिलमा रिलिज हुने जनाइएको छ ।

वार २

भारतीय फिल्म उद्योगमा ऋतिक रोशन र जुनियर एनआरटीको ‘वार २’ लाई पनि उत्तिकै बहुप्रतीक्षित मानिएको छ । यसको अघिल्लो भागले दर्शकको अपार साथ पाएको थियो । यतिबेला छायांकन भइरहेको यो फिल्म ‘स्पाइ युनिभर्स’ को एक हिस्सा हो । सन् २०२५ को अगस्तलाई रिलिज मिति तोकिएको यो फिल्ममा ठूलो लगानी गरिएको छ । फिल्मलाई आयान मुखर्जीले निर्देशन गर्दैछन् ।

यसको अघिल्लो भागमा ऋतिक रोशन, टाइगर श्राफ, वाणी कपूर, अनुप्रिया गोयंका लगायतका कलाकारको अभिनय रहेको थियो । यो फिल्मले बक्स अफिसमा कमालको व्यापार गरेको थियो ।

देवा

अभिनेता शाहिद कपूरको शीर्ष भूमिका रहने फिल्म ‘देवा’ मा बलिउडको प्रतीक्षित फिल्ममध्ये एक हो । एक्सन थ्रीलर जनराको यो फिल्ममा शाहिदका अलावा पूजा हेगडेको पनि शीर्ष भूमिका रहनेछ ।

निर्माण टिमले केही समयअघि फिल्मको फस्ट लूक सार्वजनिक गर्दै सन् २०२५ को फेब्रअरी १४ मा प्रदर्शन मिति तोकेको छ ।

अल्फा

वाईआरएफ स्पाइ युनिभर्सको फिल्म ‘अल्फा’ लाई पनि प्रतीक्षित फिल्मको सूचीमा समावेश गरिएको छ । यशराज ब्यानरमा बन्ने यो फिल्ममा आलिया भटलाई शीर्ष भूमिकामा देख्न सकिनेछ ।

यो फिल्म डिसेम्बर २०२५ मा रिलिज हुँदैछ । आलियाका साथै फिल्ममा बबी देवल, शार्भरी लगायतको अभिनय रहने जनाइएको छ । फिल्मलाई शिव रावेलले निर्देशन गर्दैछन् ।

सिकन्दर

यतिबेला छायांकनका क्रममा रहेको सलमान खानको फिल्म ‘सिकन्दर’ पनि अर्को प्रतीक्षित फिल्ममध्ये एक हो । यो फिल्ममा सलमान खानलाई एक्सन अवतारमा देख्न सकिनेछ । आउँदो इदमा रिलिज गर्ने भनिएको यो फिल्ममा रश्मिका मण्डना र सत्यराजलाई पनि देख्न सकिनेछ ।

सत्यराजले यसअघि फिल्म ‘बाहुबली’ मा कटप्पाको भूमिका निर्वाह गरेर चर्चा कमाएका थिए भने रश्मिका ‘पुष्पा’ बाट चर्चामा आएकी थिइन् ।

बागी ४

केही समयअघि पोस्टर रिलिज गरिएको फिल्म ‘बागी ४’ पनि बलिउडको प्रतीक्षित फिल्ममध्ये एक हो । यो फिल्ममा अभिनेता टाइगर श्राफलाई शीर्ष भूमिकामा देख्न सकिनेछ ।

यसअघिका भागमा टाइगरलाई खतरनाक लडाकुका रूपमा प्रस्तुत गरिएको थियो । साजिद नाडियाडवालाको निर्माण रहने यो फिल्ममा ए हर्षाको निर्देशन रहनेछ ।

लाहोर १९४७

सन्नी देवलको फिल्म ‘लाहोर १९४७’ पनि  बहुप्रतिक्षित मानिएको फिल्ममध्ये एक हो । राजकुमार सन्तोषीको निर्देशन रहने यो फिल्ममा आमिर खान, प्रीति जिन्टा, बिक्की कौशल लगायतका कलाकारहरुको अभिनय रहने छ । फिल्ममा आमिर खानको लगानी रहेको छ । फिल्मले एक मुस्लिम परिवार भारतको लखनउबाट लाहोर बसाइँ सर्दा उसको जीवनमा आउने उतारचढावको कथा भन्छ ।