काठमाडौँ– दशैँको अवसर पारेर फिल्म रिलिजको मिति तोक्नु नेपाली फिल्म निर्माताको पुरानै रोग हो । अरु समयका तुलनामा दशैँको बेला रिलिज गरिएका फिल्मले व्यापार पनि स्वभाविक रुपमा बढी गर्ने भएकाले निर्माताहरु दशैँमा फिल्म रिलिज गर्न तँछाडमछाड गर्छन् ।
दशैँमा सार्वजनिक विदा पनि धेरै हुने र चाडबाडका बेला दर्शक पनि हलसम्म आउने कारण ठूला मेकरहरु दशैँकै अवसर पारेर आफ्ना फिल्म रिलिज गर्छन् ।
दीपकराज गिरीको टिमले आफ्ना प्रायः फिल्म दशैँको अवसरमा नै रिलिज गर्ने गर्छन् भने अन्य मेकर पनि त्यही समयको प्रतीक्षामा हुन्छन् । यसपालिको दशैँमा पनि नेपाली फिल्मको महाभिडन्त भएको थियो । तर, ती फिल्मले व्यापार भने राम्रो गरेका थिए ।
यसपालिको दशैँमा रिलिज भएका ‘छक्का पञ्जा ५’, ‘बाह्र गाउँ’ र ‘बेहुली फ्रम मेघौली’ ले राम्रो व्यापार गरे भने दशैँमै रिलिजमा आएको फिल्म ‘ज्वाइँ साब’ ले पनि लगानी सुरक्षित गर्यो ।
दशैँपछि तिहारको अवसरमा रिलिज भएको फिल्म ‘पूर्ण बहादुरको सारङ्गी’ ले अहिलेसम्म पनि आक्रामक व्यापार गरिरहेको छ । यता प्रदर्शनरत केही फिल्मले केही हलमा ५१ औँ दिन मनाउने देखिएको छ ।
ह्याङओभर सकिन नपाउँदै निर्माताले आगामी दशैँलाई टार्गेट गरेर नयाँ फिल्मको घोषणा गरेका छन् । मेकरले एकपछि अर्को फिल्म निर्माणको घोषणा गर्दै गर्दा अर्को वर्ष पनि फिल्म हलमा रोचक प्रतिस्पर्धा हुने देखिएको छ ।
केही दिनअघि निर्माता रोहित अधिकारीले फिल्म ‘माइतीघर’ को निर्माण गर्ने घोषणा गर्दै उक्त फिल्म दशैँको अवसरमा रिलिज हुने बताए । यो फिल्मको कुनै तयारी नभए पनि आगामी वर्षको फूलपातीमा रिलिज हुने उनको दाबी छ । यस्तै दशैँको अवसर पारेर अर्को फिल्म ‘परालको आगो’ को पनि घोषणा गरिएको छ ।
सुहाना थापाको शीर्ष भूमिका रहने भनिएको यो फिल्म शूटिङमा पनि गएको छैन । तर, रिलिज मिति घोषणा भइसकेको छ ।
यसअघि नै विराज भट्टले आगामी दशैँमा अर्को फिल्म निर्माणको घोषणा गरेका छन् । त्यस्तै अर्का निर्देशक प्रदीप भट्टराईले पनि आफ्नो आगामी फिल्म दशैँको अवसर पारेर रिलिज गर्ने घोषणा गरेका छन् । उनी मात्र होइन, निर्माता अशोक शर्माले पनि दशैँलाई नै टार्गेट गरेर नयाँ फिल्म घोषणा गर्ने पनि फिल्मवृत्तमा चर्चा छ ।
त्यस्तै निर्माता तथा निर्देशक सन्तोष सेनले पनि आगामी दशैँमा रिलिज गर्ने गरी आफ्नो फिल्म ‘बलिदान’ को तयारी थालेका छन् । अझ रमाइलो कुरा त के छ भने दशैँको अवसर पारेर अझै कैयन् निर्माता तथा निर्देशकले फिल्मको मिति तोक्ने निश्चित छ । त्यसो त दशैँका लागि भन्दै रिलिज मिति तोक्ने तर विविध कारण देखाउँदै फिल्मको रिलिज मिति नै सार्ने पनि गरिएको छ ।
यस हिसाबले हेर्दा कतिपय फिल्म निर्माताले आफ्नो रिलिज मितिमा फेरबदल गर्ने सम्भावना पनि छ । तर, जति पनि मेकरले अहिले दशैँका लागि मिति तोकेका छन् । उनीहरु नेपालका चल्तीका निर्माता हुन् भने उनीहरुले दर्शकको साथ पनि पाउँदै आएका छन् । यस कारण कुन फिल्म दशैँको ‘महाभिडन्त’ बाट पछि हट्छ भन्ने अहिले नै अनुमान गर्न सकिने अवस्था छैन ।
यो खबर पढेर तपाईलाई कस्तो महसुस भयो ?
प्रतिक्रिया