काठमाडौँ– लोकप्रिय ब्याण्ड कन्दराले काठमाडौँमा सांगीतिक प्रस्तुति दिने भएको छ । ब्याण्डले सांगीतिक यात्राको ३२ वर्ष पुगेको उपलक्ष्यमा एलओडी क्लबमा प्रस्तुति दिन लागेको हो ।
कन्दराले एक विज्ञप्ति जारी गर्दै विश्वव्यापी कार्यक्रम गर्न लागेको समेत जनाएको छ । ‘नेपालको सांगीतिक क्षेत्रलाई लोक र पप-रकको मौलिक मिश्रणले बेग्लै आकार दिएको कन्दराले त्यस दिन आफ्नो गौरवशाली अतीतलाई मात्र सम्झिने छैन, बरू नेपाली संगीत र संस्कृतिको प्रवर्धन गर्न नयाँ विश्वव्यापी भ्रमणको सुरुवात पनि गर्नेछ।,’ विज्ञप्तिमा भनिएको छ ।
आफ्नो सांगीतिक विरासतको उत्सवका अलावा कन्दराको ३२ औं वार्षिकोत्सव कार्यक्रमले “पहिले घर देश, अनि परदेश” शीर्षकको विश्वव्यापी अभियान पनि सुरु गर्ने जनाएको छ ।
यो अभियान नेपाली संगीतलाई नेपालमा मात्र नभई अन्तर्राष्ट्रिय स्तरमा पनि प्रवर्धन गर्ने कन्दराको प्रतिबद्धता रहेको ब्याण्डले जनाएको छ । नेपाली संस्कृतिको गहिराइ देखाउने उद्देश्यका साथ यो भ्रमण सन् २०२५ को जनवरीमा बेलायत र दुबई, फेब्रुअरीमा जापान, मार्च र अप्रिलमा अस्ट्रेलिया र न्युजिल्याण्ड, मेमा अमेरिका, जुनमा क्यानडा र अन्तमा जुलाईदेखि अगस्टसम्म युरोप सम्पन्न हुनेछ।
यस अन्तर्राष्ट्रिय भ्रमणले नेपालको समृद्ध सांस्कृतिक सम्पदा र यसको विकसित हुँदै गइरहेको संगीत क्षेत्रलाई प्रतिनिधित्व गर्ने कन्दराको कालजयी गीतहरूका साथै नयाँ सिम्फोनीहरूलाई पनि विश्वव्यापी दर्शकमाझ लैजानेछ। यो संगीतको यस्तो उत्सव हो जसले सीमाहरू पार गर्नेछ र फरक महादेशहरूमा पुगेर हजारौँ हृदयहरूलाई एकसाथ जोड्ने ब्याण्डको लक्ष्य छ ।
सन् १९९० को दशकको प्रारम्भमा पोखरामा स्थापना भएको कन्दराको पुराना पुस्ता र युवा पुस्ता दुवैलाई अपील गर्ने समकालीन धुनहरूसँग लोक तत्वहरूको फ्यूजन प्रदान गर्ने संगीतले आधुनिक नेपाली संगीतलाई परिभाषित गर्नमा महत्त्वपूर्ण भूमिका खेलेको छ। आफ्नो मौलिकताप्रति इमान्दार रहँदै समयसँगै ढल्ने क्षमताले उनीहरूलाई नेपालको सांगीतिक इतिहासमा सबैभन्दा सम्मानित ब्यान्डहरूमध्ये एक बनाएको छ।
कन्दराको आगामी वार्षिकोत्सव कार्यक्रम, “काठमाण्डू कलिङ कन्दरा” नेपाली संगीत प्रेमीहरूको लागि ऐतिहासिक अवसर हुनेछ। ९० को दशकको सुरुदेखि नै नेपाली सङ्गीत प्रेमीहरूमाझ महत्वपूर्ण प्रभाव पारेको यो ब्यान्ड परम्परागत नेपाली लोक गीतहरूमा समकालीन रक प्रभाव मिसाइएका “तिमी परी”, “हङकङ पोखरा” र “लेककि हे माया” जस्ता हिट गीतहरूका लागि प्रख्यात छ। उनीहरूले सिर्जना गरेका मौलिक धुन र आवाजले सबै पुस्ताको हृदयमा राज गरेको छ भने सबै क्षेत्रका प्रशंसकहरूलाई मन्त्रमुग्ध बनाएको छ।
यो खबर पढेर तपाईलाई कस्तो महसुस भयो ?
प्रतिक्रिया