काठमाडौँ– गत साउन १८ गतेदेखि प्रदर्शनमा आएको फिल्म ‘मोदीबेनी’ केही हलबाहेक अरु हलबाट उत्रिसकेको छ । फिल्ममा वर्षा शिवाकोटी र डेब्यु अभिनेता अमर प्रताप श्रेष्ठको शीर्ष भूमिका छ ।
प्रेम कथामा आधारित यो फिल्म दोस्रो हप्तामा आइपुग्दा निकै न्यून शो पाएको छ । अर्कातिर निर्माण टिमले फिल्मको व्यापारिक आँकडा सार्वजनिक गरेको छैन ।
वास्तविक कथामा आधारित भनिएको यो फिल्मलाई शंकर कोइरालाले निर्देशन गरेका हुन् । रेजिना उप्रेती, दिलीप केसी, स्नेहा भट्टराई, प्रविण खतिवडा, सरोज खनाल लगायतका कलाकारको समेत अभिनय रहेको यो फिल्म वर्षा शिवाकोटीका कारण चर्चामा रह्यो ।
यद्यपि फिल्मले आफ्नो कमाइ सुरक्षित गर्न भने निकै हम्मे पर्ने देखिएको छ ।
निर्माण टिमका अनुसार यो फिल्म दोस्रो हप्तामा आइपुग्दा देशभर सात वटा हलमा प्रदर्शन भइरहेको छ । तीमध्ये काठमाडौँमा रञ्जना सिनेप्लेक्समा एक शो र अष्टनारायण पिक्चर्समा तीन शो मात्र चलेको छ । फिल्मलाई राजधानीका सुविधासम्पन्न मल्टिप्लेक्स हलले पहिलो हप्तामै हटाइसकेका छन् । फिल्मको व्यापार राम्रो नहुँदा पहिले नै शो घटाउँदै लगिएको थियो ।
यो फिल्मबाट वर्षा शिवाकोटीलाई पनि राम्रै अपेक्षा थियो । किनकि, उनले अभिनय गरेका फिल्मले पछिल्लो समय खासै राम्रो व्यापार गर्न सकेका थिएनन् । तर, दर्शकले यो फिल्मलाई नरुचाउँदा वर्षालाई पनि घाटा भएको छ । यसअघि वर्षाले फिल्मको खुलेरै प्रचार गरे पनि पछिल्लो समय भने उनले खासै प्रचार गरेकी छैनिन् ।
त्यसो त एउटा कलाकारका कारणले मात्र फिल्म हिट हुने या फ्लप हुने भन्ने हुँदैन । तर, मेकरले आशा गरिएअनुरुपको व्यापार भने फिल्मले गर्न सकेन । बरु अहिले वर्षा आगामी फिल्म ‘छक्का पञ्जा ५’ का कारण उत्साहित छिन् ।
फिल्म ‘छक्का पञ्जा ५’ को गीत सार्वजनिक हुने क्रममा छ । यता ‘मोदीबेनी’ को भने व्यापारिक आँकडा झन् घट्दै गएको छ ।
एक हिसाबले हेर्दा वर्षालाई ‘मोदीबेनी’ ले त खासै फाइदा दिलाउन सकेन तर आगामी प्रोजेक्ट ‘छक्का पञ्जा ५’ बाट भने राम्रै अपेक्षा गरेकी छिन् । यो फिल्ममा दीपकराज गिरी, दीपाश्री निरौला लगायतका चर्चित कलाकार भएकाले पनि यो फिल्मलाई दर्शकले चासोका साथ हेरेका छन् ।
फिल्म कस्तो चल्छ र यसले वर्षाको करिअरलाई कति राहत दिन्छ त्यो भने अहिले नै भन्न सकिने अवस्था छैन ।
यो खबर पढेर तपाईलाई कस्तो महसुस भयो ?
प्रतिक्रिया