यस्तो छ फिल्म ‘देवी’ को टिजर (भिडियो)

काठमाडौँ – फिल्म ‘देवी’ को टिजर सार्वजनिक गरिएको छ । शनिबार निर्माण पक्षले एक मिनेट ३० सेकेन्ड लामो टिजर युट्युबमा सार्वजनिक गरेको हो ।

आगामी भदौ २१ देखि प्रदर्शनमा आउने फिल्म समाजमा घट्ने बलात्कार, त्यसको अनुसन्धानमा कानुनले पार्ने प्रभाव र निम्त्याउने परिणामको कथामा आधारित रहेको छ । सञ्जोग राईको निर्देशनमा बनेको फिल्ममा केही वर्षअघि बलात्कारपछि हत्या भएकी कञ्चनपुरकी बालिका निर्मला पन्तको घटना पनि समावेश भएको प्रष्ट हुन्छ।

फिल्मलाई क्राइम थ्रिलर जनरामा निर्माण गरेको हो भने निर्देशक राई र अजय गौतमसँग मिलेर कथा लेखेका छन् ।

फिल्ममा शिल्पा मास्के, गौरव पहारी, नाजिर हुसेन, टीका पहारी, प्रभाकर न्यौपानेलगायतको अभिनय रहेको छ । एक्जिबिट स्टुडियोको प्रस्तुतिमा बनेको यो फिल्मले सार्वजनिक प्रदर्शनका लागि बाँसुरी फिल्म्ससँग सहकार्य गरेको छ ।