‘घरज्वाइँ’ ले कति कमायो दुई सातामा ?

काठमाडौँ – प्रदर्शनरत दयाहाङ राई र मिरूना मगर अभिनीत फिल्म ‘घरज्वाइँ’को दुई साताको कमाई सार्वजनिक गरिएको छ । 

निर्माण टिमका अनुसार फिल्मले दुई सातामा ४ करोड ६३ लाख रुपैयाँ ग्रस कलेक्सन गरेको छ। गत बिहीबारसम्म उक्त कमाइ गरेको फिल्मले सुरूवाती दुई दिनमा १ करोड ५१ लाख रुपैयाँ ग्रस कमाएको थियो। 

गत शुक्रबारदेखि तेस्रो सातामा प्रदर्शनरत फिल्मले बर्खायाममा पनि फिल्मले दर्शकको राम्रो साथ पाएको हो।

अनिल बुढा मगरको पहिलो निर्देशकीय यो फिल्म मगर समुदायको कथामा बनेको छ। यसमा दयाहाङ र मिरुनासहित बुद्धि तामाङ, पुष्कर गुरूङ, शिशिर बाङ्देल, राज थापा मगर, भोलाराज सापकोटा, खड्कबहादुर पुन , राज थापा, कविता आले मगर, अनु थापा लगायतको अभिनय छ।

जनक घर्ती मगर फिल्मका निर्माता हुन्। ‘घरज्वाइँ’ युरोपका विभिन्न देशहरूमा समेत प्रदर्शनको तयारीमा छ।