यसरी बढाउनुस् वाइफाइको स्पीड

वाइफाइ राउटरको सुस्त गतिले तपाईँ पक्कै पनि हैरान हुनु भएको होला । वाइफाइको स्पीड नहुँदा समस्या भएको भए केही सजिलो किसिमले तपाईँ आफैँले स्पीड बढाउन सक्नुहुन्छ ।

केही यस्ता तरिका छन्, जसले तपाईँको पुरानो वाइफाइ राउटर नफेरी नै स्पीड दोब्बरसम्म बढाउन सकिन्छ ।

राउटरलाई अग्लो स्थानमा राख्ने 

तपाईँको वाइफाइको राउटर कुन स्थानमा छ, त्यसले स्पीडमा असर गर्दछ । यस्तोमा तपाईँले राउटर कस्तो ठाउँमा राख्नुभएको छ भन्ने विचार गर्नुहोस् । यदि तपाईँले राउटरलाई भुईँमा राख्नुभएको छ भने त्यसको वाइफाइ सिग्नल डिभाइसमा पुग्न सक्दैन ।

त्यसैले वाइफाइ राउटरलाई सकेसम्म अग्लो स्थानमा राख्नुस्, जसले डिभाइसमा पुरा सिग्नल दिन सक्छ ।

राउटरको क्षमता निश्चित गर्ने

हरेक वाइफाइ राउटरमा क्षमताको निश्चित सीमा तोकिएको हुन्छ । उक्त राउटरको एरिया कभरेज निश्चित हुन्छ ।

राउटरको क्षमता र गुणस्तरअनुसार त्यसको रेन्ज तोकिएको हुन्छ । उदाहरणका लागि कुनै राउटरले ५०० मिटरसम्मको एरिया कभरेज गर्छ भने कुनैले २० मिटर मात्रै ।

त्यसैले तपाईँको वाइफाइ राउटरले कति दूरीसम्म सिग्नल दिन्छ भन्ने जानकारी राख्नुस् । यस्तो जानकारी वाईफाई राउटरको कभरमा वा त्यो डिभाइसको पछाडि लेखिएको हुन्छ ।

राउटरको वरिपरि मेटल नराख्ने

वाइफाइ राउटरको अवस्था र राखेको स्थान ठिक भए पनि कहिलेकाहीँ त्यसमा अवरोध हुन्छ ।

वाइफाइ सिग्नलको सबैभन्दा ठूलो शत्रु भनेको कंक्रिट र मेटल हो । वाइफाइको वरिपरि सकेसम्म मेटल (धातु) का सामाग्री नराख्नुहोस् ।

त्यसैगरी अन्य इलेक्ट्रोनिक्स उपकरण पनि छेउछाउ नराख्नुस् । त्यस्तै कंक्रिट पर्खाल तथा भित्ताले पनि वाइफाइको सिग्नल रोक्ने हुँदा त्यस्तो स्थानमा सकेसम्म राउटर नराख्नुस् ।

राउटर राख्ने दिशाको सुनिश्चितता

वाइफाइ राउटरले ३६० डिग्री एंगल एरिया कभर गर्दछ । यसले सबै दिशामा एकै प्रकारले सिग्नल पठाउने गर्दछ ।

त्यसैले जुन दिशामा वा स्थानमा बसे पनि केही फरक पर्दैन । तर तपाईँको वाइफाइ राउटरको स्थान र प्रयोग गर्ने डिभाइस कुन स्थानमा छ भन्ने बुझ्नुहोस् । त्यसको बीचमा कुनै अवरोध त छैनन् हेर्नुहोस् ।

रिपीटर डिभाइस प्रयोग

उल्लेखित टिप्सहरू प्रयोग गरिसक्दा पनि वाइफाइ सिग्नल कमजोर छ भने तपाईँले वाइफाइ रिपिटर लगाउनु उपयुक्त हुन्छ ।

वाइफाइ रिपिटरलाई कतै कतै वाइफाइ सिग्नल बुस्टर डिभाइसका नामले बुझ्ने गरिन्छ । यो सानो उपकरणले तपाईँको वाइफाइ राउटर र डिभाइसको दूरी बढी भए पनि वाइफाइ सिग्नललाई बढाउन सहयोग गर्दछ ।