अजय र तब्बु स्टारर फिल्म ‘अरों मे कहा दम था’ को टिजर रिलिज

काठमाडाैँ – लामो प्रतिक्षापछि अजय देवगन र तब्बु स्टारर फिल्म ‘अरों मे कहा दम था’ को टिजर रिलिज भएको छ । लामो समयदेखि फिल्मको चर्चा चलिरहेको थियो तर लगातार स्थगित हुँदै आएको थियो ।

फिल्मको पोस्टर आज बिहान रिलिज गरिएको छ जसमा अजय देवगनलाई पछाडिबाट देखाइएको छ । यो पोस्टरले फ्यानहरुको जिज्ञासा झनै बढाएको छ ।

अन्ततः अब फ्यानहरुको प्रतिक्षाको घडी सकिएको छ । टिजरसँगै निर्माण पक्षले फिल्मको रिलिज मिति पनि सार्वजनिक गरेको छ । यो एक रोमान्टिक ड्रामा फिल्म हो जुन ५ जुलाई, २०२४ मा सिनेमाघरहरूमा रिलिज हुनेछ।

चलचित्र एक अनौठो सांगीतिक प्रेमकथा हुनेछ जसमा बीस वर्षको लामो अन्तराल बीचको रोमान्टिक ड्रामालाई चित्रण गरिनेछ । फिल्मको कथा सन् २००२ देखि २०२३ सम्मको हो ।

टिजरमा के देखाइएको छ ?
भिडियो होलीको एक दृश्यबाट सुरु हुन्छ जसमा अजय देवगनको आवाजमा पछाडिबाट एउटा भ्वाइस ओभर छ। होलीको पर्वमा अजय देवगन र तब्बुले एकअर्कालाई अँगालो हाल्छन् ।

फिल्ममा अन्य कलाकार को को छन् ?
फिल्ममा जिम्मी शेरगिल, साई मांजरेकर र शान्तनु महेश्वरी पनि देखिनेछन् । शितल भाटिया, नरेन्द्र हिरावत र कुमार मंगत पाठकले निर्माण गरेको यो चलचित्रलाई एमएस धोनी र बेबी जस्ता चलचित्रका निर्देशक नीरज पाण्डेले निर्देशन गरेका हुन् ।

अजय देवगनको कुरा गर्दा उनी छिट्टै सिंघम ३ मा देखिनेछन् । सिंघमको अवतारमा अजय देवगनलाई हेर्नका लागि फ्यान निकै उत्साहित छन् । यसबाहेक, फिल्मलाई रोहित शेट्टीको कप ब्रह्माण्डमा रणवीर सिंह र अक्षय कुमारको पुनरागमनको रूपमा पनि हेरिएको छ। फिल्ममा दीपिका पादुकोण लेडी सिङ्घमको भूमिकामा देखिनेछिन् ।