पछिल्लो समय नेपालीहरुमा दमको संक्रमण बढ्न थालेको छ । देश अस्वस्थकर खानापान र जीवन शैलीका कारण लाग्ने रोगको जोखिममा पुगेको छ । त्यसैले आफू स्वस्थ रहँन खानपानमा धेरै ख्याल गर्नुपर्छ । यहाँ हामीले दम रोगीले खानपानमा कस्तो सावधानी अपनाउनु पर्ला भनेर चर्चा गरेका छौं ।
दीर्घ दमरोगीमा सास फेर्दा सक्रिय हुने मांसपेसीका कारणले कमजोर हुँदै जान्छन् । खाना खाएको समयमा वा खाँदा दम बढ्नु, पाचन प्रणाली तुलनात्मक रुपमा कमजोर हुनु, खाना खान मन नलाग्नु तथा रुचि घट्नुजस्ता कारणले बिरामीले आवश्यक मात्रामा खान सक्दैनन् । त्यसैले शरीरसँगै प्रतिरोधी क्षमतासमेत कमजोर हुन्छ । जसले गर्दा रोग निको हुन समय लाग्ने हुन्छ । तसर्थ, दम रोगका बिरामीले खानपानमा विशेष ध्यान दिन जरुरी हुन्छ ।
शक्ति दिने पोसिलो खानेकुरा खाने
खानामा अरुचिका कारण बिरामीमा तौल घट्दै जान्छ । पर्याप्त खानेकुराको अभावमा शरीरलाई आवश्यक शक्ति आर्जन गर्न मांसपेसी बढी प्रयोग हुन्छन् । जसले गर्दा शरीर कमजोर हुन्छ । त्यसैले दैनिक प्रशस्त मात्रामा शक्ति दिने खानेकुरा खानुपर्छ ।
कार्वोहाइडेट बढाउने गरी चिल्लो खाने
चिल्लो खानेकुराको सेवनले शरीरमा कार्बनडाइअक्साइड कम जम्मा भई सास फेर्न सजिलो हुन्छ । त्यसैले, खाना पकाउँदा वनस्पति तेलको प्रयोग गरी चिल्लो खानेकुरा खान सकिन्छ । तर, पशुजन्य स्रोतबाट प्राप्त हुने चिल्लो खानेकुरा खानुहुँदैन । जस्तै, बोसोयुक्त मासु, अत्याधिक नौनी, घिउ आदिले रगतमा कोलेस्ट्रोलको मात्रा बढाउँछ ।
प्रोटिनको मात्रा बढाउने
दम रोगीमा श्वासप्रणालीको मांसपेसी च्यातिने डर हुन्छ । यसको पुनर्निर्माणका लागि प्रोटियुक्त खाना आवश्यक हुन्छ । त्यसका लागि दाल, गेडागुडी, माछा, मासु, अन्डा, भटमास तथा दूधजन्य खानेकुरा नियमित खानुपर्छ ।
सुप तथा झोलिलो खानेकुरामा ध्यान दिने
शरीरमा पानीको मात्रा कम भएमा सास फेर्न गाह्रो हुन्छ । त्यसैले, प्रशस्त मात्रामा झोलिलो खानेकुरा खाँदा शरीरमा पानीको मात्रा कम हुन पाउँदैन । त्यस्तै, नुन आवश्यक मात्रामा मात्र प्रयोग गर्नुपर्छ ।
यो खबर पढेर तपाईलाई कस्तो महसुस भयो ?
प्रतिक्रिया