यी हुन् औषधि प्रयोग गर्दा बिरामीले ध्यान दिनै पर्ने ५ कुरा

१. औषधि शुरु गर्दा

बिरामीले औषधि शुरु गर्दा आफूले खाने औषधिको नामबारे राम्रोसँग जानकारी दिनुपर्छ । साथै उक्त औषधि किन प्रयोग गरिरहेको छु भन्ने जानकारी लिएर मात्र औषधि प्रयोग गर्नुपर्छ । औषधि सेवन गर्नुअघि सो औषधि खान सिफारिस गर्ने चिकित्सकलाई औषधि सेवन गर्दा हुन सक्ने जोखिम र असर (साइड इफेक्ट) बारे राम्रोसँग सोधपुछ गर्नुपर्छ ।

२.औषधि सेवन गर्दा
– औषधि सेवन गर्दा बिरामीले औषधि खाने समय र कति मात्रामा खाने भनेर राम्रोसँग जानकारी दिएर सोही अनुसार औषधि प्रयोग गर्नुपर्छ ।
–रोग लागेर औषधिको प्रयोग गर्दा सामान्य साइड इफेक्टहरु देखिन्छ । तर कहिलेकाहीँ जटिल किसिमको साइड इफेक्ट पनि देखिन सक्छ । त्यसैले औषधि सेवन गर्दा साइड इफेक्ट देखिएमा चिकित्सकसँग परामर्श लिनुपर्छ ।

३. औषधि थप्नु पर्दा

कहिलेकाहीँ चिकित्सकले सिफारिस गरेको औषधिको मात्रा पुरा भइसक्दा पनि रोग ठिक नहुन सक्छ । त्यस्तो अवस्थामा थप औषधि खानुपर्ने हुन्छ । त्यस्तो अवस्थामा आफूले स्वास्थ्य जाँच गराएको चिकित्सकसँग थप औषधि खान पर्ने वा नपर्नेबारे राम्रोसँग जानकारी लिनुपर्छ ।आफूलाई रोग ठिक नभएको भएमा र थप औषधि आवश्यक भएमा मात्र थप औषधि खानुपर्छ ।  औषधि थप्दा आफूले सेवन गरिरहेको औषधिले असर गर्ने नगर्ने बारे पनि जानकारी लिनुपर्छ ।

४.औषधिको समीक्षा

बिरामीले औषधि सेवन गर्दा कति अवधिसम्म खानुपर्ने हो भनेर राम्रोसँग जानकारी लिनुपर्छ ।  साथै आफूले लिइरहेको औषधि ठिक छ वा छैन भनेर विचार गर्नुपर्ने हुन्छ ।

५. औषधि सेवन बन्द गर्दा

औषधि रोग लाग्दा निको हुनका लागि मात्र प्रयोग गरिन्छ । त्यसैले औषधि सेवन गर्ने पनि निश्चित समय हुन्छ । दीर्घ रोगका बिरामीले खाने औषधि बाहेक अन्य सङ्क्रमणबाट हुने रोगका औषधि सीमित समयसम्म मात्र खानुपर्ने हुन्छ ।  रोग निको भइसकेपछि पनि औषधि सेवन गरेमा त्यसको नकारात्मक असर हुनसक्छ । त्यसैले औषधि सेवन गर्दा कहिलेसम्म सेवन गर्नुपर्ने हो भन्ने बारे जानकारी लिनुपर्छ । चिकित्सकले सिफारिस गरेको अवधि सम्म मात्र औषधि सेवन गर्नुपर्छ ।