पछिल्लो समय नेपाली मोडलिङ क्षेत्रमा प्रवेश गरेर यसमै आफ्नो भविष्य देख्ने धेरै युवायुवतीहरू भेटिन्छन् । नाम र दाम दुवै सहज किसिमले प्राप्त हुने देखिने यो क्षेत्रमा लगाव नभई लाग्दा यहाँ करियर बनाउने निकै कम छन् ।
यहाँ गर्नुपर्ने संघर्षले गर्दा नै भविष्य नदेख्नेको पनि कमी छैन । यद्यपि मोडलिङ छाड्ने भन्दा भित्रिनेको संख्या नै बढ्दो छ । यस्तै भिडमा मोडलिङमै आफ्नो भविष्य देख्नेमा पर्छिन्, मोनिका बुढाथोकी ।
काठमाडौँको कपनकी स्थायी बासिन्दा मोनिकाले एक संस्था मार्फत प्रशिक्षण लिएर मोडलिङमा भित्रिएकी हुन् । बुवा पेशाले प्रधानाध्यापक भएकाले बाल्यकालमामा पढाइ बाहेक अन्य क्षेत्रमा लाग्ने छुट नभएता पनि उनी मोडलिङमा लागिन् ।
मोडलिङसँगै पढाइलाई समेत अगाडि बढाइरहेकी मोनिका ’मिस नेशनल २०१७’ मा भाग लिएसँगै मोडलिङमा सक्रिय छिन् ।
विभिन्न सांगीतिक कार्यक्रमसँगै फेशन कार्यक्रममा समेत गर्दै आइरहेकी मोनिकाले केही म्युजिक भिडियोमा समेत अभिनय गरेकी छिन् ।
