काठमाडौँ– हामीमध्ये कतिपयलाई पायल्सको समस्याले गाँजिरहेको हुन्छ । पायल्स किन हुन्छ भन्ने हामीलाई थाहा हुँदैन तर यसले निकै दुःख दिन्छ ।
दैनिक खानपान बिग्रँदा पनि पायल्स भएको हुन्छ । यसको बेलैमा उपचार नगराए अपरेशन पनि गर्नुपर्ने अवस्था हुन्छ ।
आयुर्वेदिक चिकित्सक डाक्टर विजेन्द्र साहले पायल्स हुनुको मुख्य कारण कब्जियत भएको बताउँछन् । उनका अनुसार खानामा अपच हुँदा कब्जियत हुन्छ । कब्जियत भइसकेपछि दिशा बस्दा बल प्रयोग गर्नुपर्ने हुन्छ । यस्तो अवस्थामा पायल्स हुने सम्भावना हुन्छ ।
‘अहिलेको समयमा धेरै मानिस चर्पीमा जाँदा पनि मोबाइल हेर्ने, पत्रिका पढ्ने गर्छ, लामो समय ट्वाइलेटमा बस्दा पनि पायल्स हुने सम्भावना हुन्छ,’ उनी भन्छन् ।
उनका अनुसार खाने कुरामा पनि ख्याल गर्नुपर्छ । व्यस्त जीवनशैलीका कारणले पनि मानिसले खानपानमा खासै ध्यान दिएको पाइँदैन । यसले गर्दा पनि पायल्स हुन सक्छ ।
भोक लागेको बेला नखाने, राति अबेरसम्म अनिधो बस्ने, आवश्यकताभन्दा बढी खाने गर्दा पनि पायल्स हुने डा. साहको भनाइ छ ।
उनका अनुसार पायल्स हुँदा ट्वाइलेट बस्दा दिशामा रगत आउने, मलद्धारमा मासुको डल्लो पलाउने, मलद्वारबाट सिँगान जस्तो बग्ने, मलद्वारबाट पानी बग्ने र मलद्वार चिलाउने दुख्ने, सुन्निने लगायतका लक्षण देखिन्छन् ।
जंक फुड धेरै खाने, रातो मासु खाने र अदुवा खाने व्यक्तिमा यो समस्या बढी बल्झिएको डा. साह बताउँछन् ।
यो खबर पढेर तपाईलाई कस्तो महसुस भयो ?
प्रतिक्रिया