हरी भण्डारीको ‘पठाउ चढेर’ सार्वजनिक

काठमाडौं- नेपाली तिज भाकामा आधारित नयाँ गीत “पठाउ चढेर” को म्युजिक भिडियो सार्वजनिक गरिएको छ। लोकसंस्कृति र समसामयिक नारी भावनालाई समेट्ने यस गीतमा लोकप्रिय अभिनेत्री रेजिना उप्रेती र कलाकार हरी भण्डारी को आकर्षक अभिनय देख्न पाइन्छ, जसले भिडियोमा अतिरिक्त ऊर्जा र चमक थपेको छ।

गीतको निर्देशन ईश्वर बल्लभ उप्रेती ले गरेका छन् भने कोरियोग्राफीको जिम्मा प्रदिप कुमार रसाइली ले सम्हालेका छन्। गायनमा सुबिना श्रेष्ठ र राजु आरडी को सुमधुर स्वरले गीतलाई झन् लयात्मक बनाएको छ।

काठमाडौं र भक्तपुरका रमणीय स्थानहरूमा छायाङ्कन गरिएको भिडियोमा डान्सिङ फ्लेभर, मौलिक तिज संस्कार र भौगोलिक सौन्दर्यको उत्कृष्ट संयोजन देख्न सकिन्छ। गीतका शब्द र संगीत राजु आरडी को रहेको छ भने रेकर्डिङ, मिक्सिङ र मास्टरिङ याचबिएन किस्मतले गरेका हुन्।

भिडियोको छायाङ्कन रामेश्वर हुमागाईं, सम्पादन टेकेन्द्र शाह र मेकअप राकेस रनपाल को रहेको छ। सम्पूर्ण टिमको समर्पण र रचनात्मकतालाई भिडियोमा स्पष्ट रूपमा अनुभूत गर्न सकिन्छ।

भिजुअल, संगीत र प्रस्तुतीकरणको हिसाबले “पठाउ चढेर” युट्युब तथा अन्य डिजिटल प्लेटफर्ममा छिट्टै लोकप्रिय हुने विश्वास गरिएको छ। तिज नजिकिंदै गर्दा संगीतप्रेमीहरूका लागि यो गीत विशेष उपहार सावित हुने अनुमान गरिएको छ।