सोमबार जन्मिएका व्यक्तिको स्वभाव कस्तो हुन्छ

काठमाडौं- ज्योतिष शास्त्र अनुसार जन्म हुने वारले व्यक्तिको स्वभाव, रुचि र व्यवहारमा गहिरो प्रभाव पार्दछ। विशेषगरी सोमबार जन्मिएका व्यक्तिहरूलाई शान्त, भावुक र आध्यात्मिकतामा रुचि राख्ने स्वभावका मानिन्छ।

सोमबारको सम्बन्ध चन्द्रमासँग हुने भएकाले यस दिन जन्मिनेहरूमा चन्द्रको प्रभाव प्रबल हुन्छ। चन्द्र ग्रहलाई मन र भावना सँग सम्बन्धित मानिन्छ, जसका कारण सोमबार जन्मिने व्यक्ति भावुक, संवेदनशील, दयालु र सहानुभूतिशील हुन्छन्। यिनीहरू सानातिना कुरामा चित्त दुखाउने स्वभावका हुन्छन् तर भित्रभित्रै अत्यन्त सहनशील र समर्पित पनि हुन्छन्।

धार्मिक र सांस्कृतिक विश्वासप्रति गहिरो आकर्षण राख्ने सोमबार जन्मिएका व्यक्तिहरू पारिवारिक मूल्य, परम्परा र आस्थालाई सम्मान गर्ने स्वभावका हुन्छन्। उनीहरूमा अरूको सेवा गर्ने भावना प्रबल हुन्छ र समाजसेवामा पनि सक्रिय देखिन्छन्।

यस्ता व्यक्तिहरू कलात्मक, सिर्जनात्मक कार्यमा पनि रुचि राख्ने देखिन्छन्। जीवनमा शान्ति, सन्तुलन र भावनात्मक स्थायित्व खोज्ने उनीहरू प्रेममा समर्पित र वफादार हुने गर्छन्। यद्यपि कहिलेकाहीँ अत्यधिक भावुकताले उनीहरूलाई निर्णय क्षमतामा असर गर्न सक्ने देखिन्छ।

ज्योतिष अनुसार चन्द्रमा बलियो भएमा सोमबार जन्मिएका व्यक्ति मानसिक रूपमा सशक्त र सफल हुनसक्ने हुन्छन्। तर कमजोर चन्द्रले उनीहरूलाई अनावश्यक चिन्ता र तनावमा राख्न सक्छ। त्यसैले उनीहरूलाई नियमित ध्यान, योग, वा प्रकृतिमा समय बिताउने सुझाव दिइन्छ।