गुलाबी ओठ बनाउन चाहानुहुन्छ ? चिनीमा यी दुई सामग्री मिसाउनुस

काठमाडौं। धेरैको सौन्दर्यको चाहना हुने गर्छ । गुलाबी, नरम र आकर्षक ओठ। तर, मौसम, धूम्रपान, अत्यधिक चिया–कफीको सेवन वा प्रयोग गरिने कस्मेटिक उत्पादनका कारण धेरैलाई ओठ कालो हुने समस्या देखिन्छ। यस्तो समस्याबाट ग्रस्तहरूका लागि घरमै सजिलै बनाउन सकिने स्क्रब उपयोगी हुन सक्छ।

स्वास्थ्य तथा सौन्दर्य विज्ञहरूका अनुसार, चिनीमा दुई प्राकृतिक सामग्री मिसाएर बनाइने स्क्रबले केही दिनमै ओठलाई गुलाबी र नरम बनाउन मद्दत गर्छ। यसमा मुख्य रूपमा प्रयोग गरिने छन्, कागती र मह।

कागती र चिनीको संयोजन: प्राकृतिक स्क्रब

कागतीमा पाइने साइट्रिक एसिड र भिटामिन C ले ओठको कालोपन हटाउन मद्दत गर्छ। चिनी भने प्राकृतिक एक्सफोलिएन्टका रूपमा प्रयोग हुन्छ, जसले ओठबाट मृत छाला हटाउँछ।

विशेषज्ञहरूका अनुसार, “कागतीको ब्लीचिंग गुणले कालो ओठको रंग फिक्का बनाउने कार्य गर्छ, जबकि चिनीले त्यसलाई सफा गर्छ। हप्तामा दुई पटक यसको प्रयोग गर्दा सकारात्मक नतिजा देखिन्छ।”

मह र चिनीको मिश्रण: ओठलाई पोषण दिने उपाय

दोस्रो लोकप्रिय उपाय हो — मह र चिनीको संयोजन। मह एक प्राकृतिक मोइस्चराइजर हो जसले ओठलाई हाइड्रेट राख्छ। महमा रहेका एन्टिअक्सिडेन्ट र एन्टी–इन्फ्लेमेटरी गुण ओठको छालालाई सन्तुलित राख्न सहयोगी हुन्छन्।

महले ओठको प्राकृतिक रंग फिर्ता ल्याउने काम गर्छ भने चिनीले पुरानो, सुक्खा छाला हटाउँछ। विज्ञहरू भन्छन्, “यो मिश्रण ओठलाई एक्सफोलिएट र पोषण दुवै दिन्छ।”

घरमै बनाउने विधि यस्तो छ

यो स्क्रब बनाउनका लागि आवश्यक सामग्री:

१ चम्चा चिनी

½ चम्चा कागतीको रस

½ चम्चा मह

यी सामग्रीलाई एकसाथ राम्ररी मिसाएर पेस्ट तयार गर्नुहोस्। पेस्टलाई ओठमा लगाएर २ मिनेट बिस्तारै मालिस गर्नुहोस्। त्यसपछि ५ मिनेट त्यत्तिकै छोडेर मनतातो पानीले धुनुहोस्।

विशेषज्ञहरूका अनुसार, यो स्क्रबलाई हप्तामा दुई पटक प्रयोग गर्नुपर्छ। नियमित प्रयोगले ओठको रंग परिवर्तन हुँदै जान्छ, ओठ गुलाबी र नरम बन्ने गर्छ।