काठमाडौँ – वैज्ञानिकहरूले आर्टिफिसियल इन्टेलिजेन्स (एआई)को सहयोगले दुई नयाँ सम्भावित एन्टिबायोटिक्स आविष्कार गरेका छन् ।
जसले औषधि प्रतिरोधी गनरिया र एमआरएसएजस्ता खतरनाक ब्याक्टेरियालाई मार्न सक्ने बताएका छन्। यी नयाँ औषधिहरूलाई प्रयोगशालामा र सङ्क्रमित जनावरमा परीक्षण गर्दा सफल भएको जानकारी दिइएको छ।
हाल यी औषधिहरूलाई मानिसमा प्रयोग गर्न थप परीक्षण र परिष्कृत गर्न आवश्यक छ, जसमा केही वर्ष लाग्ने अनुमान गरिएको छ। त्यसपछि मात्र डाक्टरहरूले यी औषधिहरू सिफारिस गर्न सक्नेछन्।
बीबीसीमा प्रकाशित समाचारका अनुसार मासाचुसेट्स इन्स्टिच्युट अफ टेक्नोलोजी (एमआईटी)का विज्ञहरूले भनेका छन्, एआईले एन्टिबायोटिक्स खोज्न “दोस्रो सुनौलो युग” ल्याउन सक्छ।
किन आवश्यक छ नयाँ एन्टिबायोटिक्स ?
विश्वभरि औषधि प्रतिरोधी ब्याक्टेरियाले दैनिक हजारौं मानिसको ज्यान जाने गरिरहेको छ। लामो समयदेखि नयाँ प्रकारका एन्टिबायोटिक्स विकास हुन सकेका छैनन्। धेरै प्रयोगका कारण ब्याक्टेरियाहरूले ती औषधिबाट बच्ने क्षमता विकास गरिरहेका छन्। अतः नयाँ औषधिको खोजी अत्यन्तै जरुरी छ।
एआई कसरी काम गर्छ ?
एमआईटीको टोलीले एआईलाई ३ करोड ६० लाख भन्दा बढी यौगिकको अध्ययन गर्न लगाएको थियो, जसमा नयाँ र अन्वेषणीय रासायनिक संरचनाहरू पनि थिए।
एआईले अणुहरूका संरचना र ब्याक्टेरियाको प्रतिक्रिया विश्लेषण गरी दुई तरिकाले नयाँ एन्टिबायोटिक्स डिजाइन गर्यो:
पहिलो, हजारौं सम्भावित यौगिक पहिचान गरी थप अनुसन्धान
दोस्रो, पूर्ण स्वतन्त्र रूपमा नयाँ संरचना निर्माण
साथै, मानिसलाई हानिकारक हुन सक्ने तत्व र विद्यमान एन्टिबायोटिक्ससँग मिल्ने यौगिकहरूलाई छानिएको थियो।
परीक्षण र सम्भावित प्रभाव
यी नयाँ औषधिहरूलाई प्रयोगशालामा र सङ्क्रमित मुसामा परीक्षण गर्दा गनरिया र एमआरएसए विरुद्ध प्रभावकारी देखिएका छन्।
एमआईटीका प्राध्यापक जेम्स कलिन्सले भने, “हामीले देखाएका छौं कि जेनरेटिभ एआईले नयाँ एन्टिबायोटिक्स छिटो र सजिलै डिजाइन गर्न सक्छ।”
तर, अझै यी औषधिहरूलाई मानवीय प्रयोगका लागि थप परिष्कार र लामो क्लिनिकल परीक्षण गर्नु पर्नेछ।
चुनौतिहरू र भविष्य
डा एन्ड्र्यू एड्वार्ड्स (इम्पेरियल कलेज लण्डन) ले यस अनुसन्धानलाई अत्यन्तै महत्त्वपूर्ण भने तर औषधिको सुरक्षा र प्रभावकारिताबारे कडा परीक्षण आवश्यक रहेको बताए।
युनिभर्सिटी अफ वारविकका प्राध्यापक क्रिस डवसनले यो एक सकारात्मक कदम भए तापनि नयाँ एन्टिबायोटिक्स विकाससँग आर्थिक चुनौती पनि जोडिएको बताएका छन्।
एउटा औषधि कम प्रयोगमा आउँदा ब्याक्टेरियाले प्रतिरोध विकास गर्दैन तर औषधि कम्पनीहरूलाई नाफा कम हुन सक्छ।
यो खबर पढेर तपाईलाई कस्तो महसुस भयो ?
प्रतिक्रिया