काठमाडौँ – बलिउड अभिनेत्री रानी मुखर्जी राष्ट्रिय चलचित्र पुरस्कार जितेपछि सिद्धिविनायक मन्दिर पुगेर भगवान गणेशको आशीर्वाद लिएकी छिन्। करिब ३० वर्षको फिल्मी यात्रामा पहिलो पटक राष्ट्रिय सम्मान प्राप्त गरेपछि रानीले आफ्नो भावनात्मक क्षण भगवानसँग बाँड्न मन्दिर पुगेकी हुन्।
रानीले फिल्म ‘मिसेस चटर्जी भर्सेस नर्वे’ मा उत्कृष्ट अभिनयका लागि सर्वश्रेष्ठ अभिनेत्रीको पुरस्कार जितेकी हुन्। यो फिल्म एक सशक्त आमाको संघर्ष र भावनात्मक लडाइँमा आधारित यथार्थ कथामा निर्माण गरिएको हो।
सिद्धिविनायक मन्दिरले आफ्नो आधिकारिक इन्स्टाग्राम पेजमा रानीको दर्शन गरिरहेको तस्बिरहरू सार्वजनिक गरेको छ। तस्बिरहरूमा उनी निलो पारम्परिक पोशाकमा, निधारमा तिलक र काँधमा शलसहित भगवानको मूर्तिको अगाडि हात जोडेर उभिएको देखिन्छिन्। सामाजिक सञ्जालमा फ्यानहरूले उनलाई बधाई दिँदै उनका लागि गर्वको क्षण भनेका छन्।
२०२३ मा रिलिज भएको यो फिल्ममा रानीले देबिका चटर्जी नाम गरेकी आमाको भूमिका निर्वाह गरेकी छिन्, जसले विदेशी सरकारसँग आफ्ना बच्चाहरूको हकको लागि संघर्ष गर्छिन्। दर्शक र समीक्षकहरूबाट प्रशंसा बटुलेको फिल्म हाल नेटफ्लिक्समा उपलब्ध छ।
‘राजा की आएगी बारात’ बाट करियर सुरु गरेकी रानीले ‘कुछ कुछ होता है’, ‘हम तुम’, ‘बन्टी और बबली’, ‘हिचकी’ जस्ता सफल फिल्महरू दिएकी छन्। उनी अब ‘मर्दानी ३’ मा देखिनेछिन्, जहाँ उनी फेरि एकपटक कडा महिला प्रहरीको भूमिकामा फर्किने तयारीमा छिन्।
शाहरुख खानले पनि जिते पहिलो राष्ट्रिय पुरस्कार
यस वर्षको राष्ट्रिय पुरस्कार समारोह बलिउड सुपरस्टार शाहरुख खान का लागि पनि विशेष रह्यो। उनले फिल्म ‘जवान’ मा अभिनयका लागि पहिलो पटक राष्ट्रिय चलचित्र पुरस्कार जितेका छन्। उनलाई सर्वश्रेष्ठ अभिनेता को सम्मान प्रदान गरिएको हो।
यो खबर पढेर तपाईलाई कस्तो महसुस भयो ?
प्रतिक्रिया