काठमाडौँ – धेरै महिलाहरू स्तन नजिकै वा ब्रा स्ट्र्याप मुनि छाला कालो हुने समस्याबाट पीडित हुन्छन्। यो अवस्था विशेषगरी गर्मीको मौसममा, पसिना धेरै आउने वा लामो समयसम्म टाइट ब्रा लगाउँदा देखिन्छ। यस्तो परिवर्तन देखिएपछि धेरैलाई चिन्ता हुन्छ — के यो स्तन क्यान्सरको संकेत हो ?
सामाजिक सञ्जाल तथा स्वास्थ्य सम्बन्धी वेबसाइटहरूमा यसबारे धेरै खोज हुने गरेको पाइन्छ। चिकित्सकहरूका अनुसार भने यस्तो समस्या सधैं गम्भीर हुँदैन, तर लक्षणहरू बुझेर आवश्यक सावधानी अपनाउनु जरुरी हुन्छ।
छाला किन कालो हुन्छ ?
ब्रा टाइट हुँदा वा लगातार रगडिन जाँदा छालामा हाइपरपिग्मेन्टेसन हुन सक्छ। चिकित्सकीय भाषामा यसलाई “घर्षण मेलानोसिस” भनिन्छ। लगातार घर्षण र पसिनाका कारण मेलानिन उत्पादन बढेर छाला गाढो हुन सक्छ।
कहिलेकाहीँ ओसिलो वातावरण वा सरसफाइको कमीले गर्दा फंगल संक्रमण पनि हुन सक्छ, जसले छाला अझ कालो देखिन सक्छ।
के यो स्तन क्यान्सरको लक्षण हो ?
अमेरिकन क्यान्सर सोसाइटी र जर्नल अफ क्लिनिकल एण्ड एस्थेटिक डर्मेटोलोजी का अनुसार, केवल छाला कालो हुनु मात्रले स्तन क्यान्सर भएको पुष्टि हुँदैन। तर केही विशिष्ट लक्षणहरू छन्, जसले स्तन क्यान्सरको सम्भावना जनाउन सक्छ:
स्तनमा गाँठो वा कडा भाग
निप्पलबाट असामान्य डिस्चार्ज
स्तनको आकार वा बनावटमा परिवर्तन
छालामा सुनिने, डिम्पल वा सुन्तलाजस्तो बनावट
लगातार रातोपन वा दुखाइ
यदि यी लक्षणहरू देखा परेका छन् भने, छिट्टै चिकित्सकको सल्लाह लिनु अत्यावश्यक हुन्छ।
छाला कालो भएमा के गर्ने ?
सही साइजको ब्रा लगाउने
सुताको ब्रा प्रयोग गर्ने (सिंथेटिक कपडाले छाला बन्द गराएर पसिना थुन्न सक्छ)
दैनिक ब्रा परिवर्तन गर्ने र शरीरको सरसफाइमा ध्यान दिने
छालामा नरम मोइस्चराइजर, एलोभेरा जेल वा सनस्क्रिन प्रयोग गर्ने
चिलाउने, रातोपन वा दुर्गन्ध देखिएमा एन्टी-फंगल क्रिम प्रयोग गर्ने
कहिले चिकित्सकको सल्लाह लिने ?
यदि स्तनमा गाँठो, निप्पलबाट स्राव, छालामा डिम्पल, सुन्निने वा दुखाइजस्ता लक्षणहरू छन् भने तुरुन्तै विशेषज्ञसँग सम्पर्क गर्नुहोस्।
छाला कालो हुनु सामान्यतया घर्षण, मोटोपन, पसिनाको असर र सरसफाइको कमी हो — तर यो लामो समयसम्म सुधार नभए वा अन्य लक्षणसँगै देखिएमा गम्भीर रोगको संकेत पनि हुन सक्छ।
यो खबर पढेर तपाईलाई कस्तो महसुस भयो ?
प्रतिक्रिया