जब पूर्वप्रेमीले अनुहार चोरेर बनाइदिए ‘पोर्नस्टार’

नयाँ दिल्ली- भारतमा एआई प्रविधिको दुरुपयोगमार्फत बनाइएको एक नकली ‘इन्फ्लुएन्सर’को पर्दाफास भएको छ। ‘बेबी डल अर्ची’ नामले परिचित इन्स्टाग्राम प्रयोगकर्ता वास्तवमा कुनै व्यक्ति नभई कृत्रिम रूपमा निर्माण गरिएको डिजिटल पात्र रहेको खुलासा भएपछि सामाजिक सञ्जालमा बहस तीव्र बनेको छ।

केही दिनमै १४ लाख फलोअर्स संकलन गरेको उक्त खाताले एक महिलाको अनुहारको अनुमति बिना प्रयोग गरी ‘डीपफेक’ सामग्री तयार पारेको थियो। भिडियो र फोटोमा रातो सारीमा रोमानियाली गीतमा नाच्ने दृश्य तथा विदेशी सेलिब्रेटीहरूसँग देखिने झुटा तस्बिरले यो पात्र भाइरल बनेकी थिइन्।

प्रहरी अनुसन्धानले खुलाएको छ कि असमकी गृहिणी साँचीको तस्बिर चोरेर उनका पूर्वप्रेमी प्रतिम बोराले बदला लिन खाता सिर्जना गरेका रहेछन्। बोरा मेकानिकल इन्जिनियर हुन् र उनले ChatGPT, Dzine, जस्ता उपकरणको सहयोगमा सामग्री उत्पादन गरेका थिए। बोरा बिरुद्ध यौन उत्पीडन, साइबर अपराध, र जालसाजीको अभियोग लगाइएको छ। दोषी ठहरिएमा उनलाई १० वर्षसम्मको जेल सजाय हुन सक्छ।

यो खाता इन्स्टाग्रामबाट हटाइएको भए पनि त्यसका फेक सामग्रीहरू अझै पनि इन्टरनेटमा फैलिरहेका छन्। प्रारम्भिक तथ्याङ्क अनुसार बोराले उक्त खाताबाट १० लाख रुपैयाँभन्दा बढी कमाइ गरिसकेका थिए।

साँची आफैं सामाजिक सञ्जालमा सक्रिय नभएकी कारण उनलाई यो सब बारे जानकारी हुन ढिलो भयो। उनी र उनको परिवारलाई खाता बनाउने बेलामा ब्लक गरिएको थियो। जब मिडियामा अर्चीको चरित्र भाइरल हुन थाल्यो, तब मात्र वास्तविकता पत्ता लाग्यो।

एआई विज्ञहरू भन्छन्, “यो घटनाले देखाउँछ कि प्रविधिको दुरुपयोगबाट व्यक्तिगत पहिचान, प्रतिष्ठा र आत्मसम्मान माथि कस्तो खतरा पर्न सक्छ।” विशेषज्ञ मेघना बालले भन्छिन्, “डीपफेक प्रविधि आफैंमा समस्या होइन, तर नियन्त्रणबिना यसको प्रयोग अपराधको औजार बन्न सक्छ।”

यो घटना भारतमा डिजिटल सुरक्षाको खाँचो र कानुनी सुधारको आवश्यकता प्रति गम्भीर संकेत हो। डिजिटल युगमा महिलाहरूको सुरक्षालाई सुनिश्चित गर्न अब कानुनी तथा प्रविधिक उपाय आवश्यक भएको भन्दै नागरिक समाजले सरकारसँग माग गरिरहेको छ।